დედოფალ ელიზაბეთ II-ისა და პრინც ფილიპის საქორწილო ტორტის ერთი ნაჭერი, Reeman Dansie-ის მიერ გამართულ აუქციონზე 2200 ფუნტად გაიყიდა. უნიკალური სიდიდის ტორტი მონარქის ქორწილისთვის 77 წლის წინ გამოაცხვეს და მისი რამდენიმე ნაჭერი ამ დრომდე ინახება.

ფოტო: CNN

აუქციონზე გატანილი ტორტის ნაჭერი საჭმელად ვარგისი, სავარაუდოდ, ნამდვილად აღარ არის, ვინაიდან, დიდი ბრიტანეთის დედოფლის ქორწილის შემდეგ, რომელიც 1947 წლის 20 ნოემბერს შედგა, 77 წელი გავიდა. თუმცა თითქმის ექსპონატად ქცეული ტორტის ნაჭერი ჯერ კიდევ ლამაზად არის შეფუთული პატარა ყუთში, რომელზეც იმდროინდელი პრინცესა ელისაბედის ვერცხლის ნიშნებია ამობეჭდილი. ამ ყუთით, ძვირფასი ტკბილეული, თითქმის 8 ათეული წლის წინ, ბუკინგემის სასახლიდან სამეფო წყვილის საჩუქრად, შომარიონ პოლსონს ედინბურგში გაუგზავნეს. ეს ქალბატონი შოტლანდიაში დიდი ბრიტანეთის მონარქის ოფიციალური რეზიდენციის ჰოლირუდის სასახლის დიასახლისი იყო.

ნამცხვართან ერთად ქალბატონმა პოლსონმა მიიღო წერილი ელიზაბეთისგან, სადაც მადლობა გადაუხადა მას "სასიამოვნო საქორწინო საჩუქრისთვის".

ფოტო: CNN

ელიზაბეთისა და ფილიპის საქორწინო ტორტი ნამდვილად ექსტრავაგანტური იყო, ეს არის ცხრა ფუტის სიმაღლის საკონდიტრო შედევრი, რომელიც 500 ფუნტს იწონიდა. მას ამშვენებდა ორივე ოჯახის გერბი და წყვილის საყვარელი აქტივობების შაქრიანი ფიგურები. ტორტი 2000 ნაჭრიანი იყო სამეფო ქორწილში მიწვეული სტუმრების სამყოფად და ასევე, გაეგზავნა საქველმოქმედო ორგანიზაციებს, ტორტის ერთი იარუსი კი, პრინცი ჩარლზის ნათლობისთვის ინახებოდა.

ამ ნაჭრებიდან რამდენიმე ათწლეულებსაც გადაურჩა და აუქციონზე გაიყიდა, მაგალითად, 2013 წელს, რომელიც 1750 ფუნტი სტერლინგს ღირდა.