დღეს, 9 ნოემბერს დედაქალაქის სხვადასხვა ლოკაციაზე საპროტესტო მსვლელობა მოეწყო.

ამ მომენტისთვის [18:40] მეტროსადგურ "მარჯანიშვილიდან" და "სახელმწიფო უნივერსიტეტიდან" წამოსული საპროტესტო მსვლელობის მონაწილეები თბილისის სახელმწიფო უნივერსიტეტთან გაერთიანდნენ.

საპროტესტო მსვლელობაში მონაწილეობენ ერთიანობა ნაციონალური მოძრაობის, კოალიცია ძლიერი საქართველოსა და ცვლილებებისთვის ლიდერები და მხარდაჭერები.

პროტესტის ორგანიზატორები 2024 წლის საპარლამენტო არჩევნების შედეგებს აპროტესტებენ. მათი დღევანდელი ლოზუნგია — არა რუსულ არჩევნებს.

მსვლელობის მონაწილეებსა და ქართულ საზოგადოებას გაერთიანებული ოპოზიციის ლიდერებმა მიმართეს.

მაგალითად, მამუკა ხაზარაძემ თქვა, რომ ისტორიის გზაგასაყარზე ქართველ ხალხს არ აქვს უფლება ეს მომენტი გაუშვას ხელიდან. მან პირობა დადო, რომ პროტესტი უწყვეტი იქნება.

ფოტო: მამუკა ხაზარაძე Mamuka Khazaradze - 9 ნოემბერი / საპროტესტო მსვლელობა

ლაშა ბაქრაძის თქმით, მზადება უნდა გაგრძელდეს მთავარი თარიღისთვის, რომელიც ცესკოს მიერ არჩევნების გამოცხადების დღე იქნება, რის შემდეგაც პარლამენტის პირველი სხდომა გაიმართება, ამ მომენტისთვის კი პროტესტი უნდა იყოს არნახულად მძლავრი, დღევანდელი მსვლელობების მსგავსი პროტესტები კი ყოველდღიურად საჭიროა და ეს ასეც იქნება.

ფოტო: ვიდეოკადრი - 9 ნოემბერი მსვლელობა - არა რუსულ არჩევნებს

"მნიშვნელოვანია არჩევნების მიტაცებისადმი შეუგუებლობის მუდმივი დაფიქსირება, მაგრამ ამავდროულად დაუღალავი მუშაობა, რათა საერთაშორისო ასპარეზზე შენარჩუნდეს არსებული პოზიციები" — თქვა ნაციონალური მოძრაობის თავმჯდომარემ, თინა ბოკუჩავამ

ფოტო: ვიდეოკადრი - რადიო თავისუფლება / 9 ნოემბერი

შეგახსენებთ, ოპოზიციურმა პარტიებმა და საქართველოს პრეზიდენტმა საპარლამენტო არჩევნების შედეგი გაყალბებულად გამოაცხადეს, არ აღიარეს და ახალი არჩევნების ჩატარება მოითხოვეს.