საქართველოს საგარეო საქმეთა სამინისტრო აცხადებს, რომ ბარსელონაში მომხდარ ტერორისტულ აქტთან დაკავშირებით ქ. ბარსელონაში საქართველოს საკონსულოში მოქმედებს ცხელი ხაზი: +34687661274.

ასევე 24 საათიანი ცხელი ხაზი მოქმედებს საგარეო საქმეთა სამინისტროს საკონსულო დეპარტამენტში: (+995 32) 294 50 50.

უწყება ბარსელონაში მყოფ საქართველოს მოქალაქეებს მოუწოდებს, მაქსიმალურ კოორდინაციაში იყვნენ საქართველოს საკონსულო დაწესებულებასთან და გაითვალისწინონ ადგილობრივი პოლიციის რეკომენდაცია.

ფოტო: Vil Music / Twitter

დღეს, 17 აგვისტოს, ბარსელონაში, ტურისტებით დატვირთულ ქუჩაზე მოსიარულეებში მიკროავტობუსის შევარდნის შედეგად რამდენიმე ადამიანი დაიღუპა. ესპანური მედია ამბობს, რომ შემთხვევას 13 პირი ემსხვერპლა, თუმცა პოლიცია გარდაცვლილების სრულ რაოდენობაზე ჯერჯერობით არ საუბრობს.

Guardian-ის ინფორმაციით, პოლიცია 1 პირის დაღუპვას ადასტურებს. დაშავებულია 32 პირი, მათ შორის 10 მძიმედ.

BBC-ის ცნობით, მანქანის გაჩერების შემდეგ, მისი მძღოლი ადგილიდან გაიქცა, ხოლო ორი შეიარაღებული კაცი ბარში შევარდა.

პოლიცია მოქალაქეებს მოუწოდებს ადგილზე დარჩნენ და ტერიტორია მას შემდეგ დატოვონ, როდესაც ეს უსაფრთხო იქნება.

ადგილობრივმა პოლიციამ მომხდარი ტერაქტად შეაფასა.