საქართველოს მმართველი პარტია ლიდერობს, პროევროპული ოპოზიცია აცხადებს, რომ არჩევნები "მოპარულია", – ამის შესახებ BBC წერს.

"საქართველოში ავტორიტარულმა მმართველმა პარტიამ გამოაცხადა გამარჯვება მას შემდეგ, რაც წინასწარმა შედეგებმა მისი აშკარა უპირატესობა აჩვენა არჩევნებში, რომელიც ფოკუსირებულია ქვეყნის ევროპულ მომავალზე. ცენტრალური საარჩევნო კომისიის ინფორმაციით, მილიარდერი ბიზნესმენის, ბიძინა ივანიშვილის პარტია „ქართული ოცნება“ ხმების 72%-ის დათვლის შედეგად 53%-ს იღებს. წინასწარი შედეგები მკვეთრად განსხვავდებოდა დასავლური კვლევითი ორგანიზაციების მიერ ჩატარებული ეგზიტპოლებისგან და ოპოზიციური პარტიის ერთ-ერთმა ლიდერმა განაცხადა, რომ მათ სჯერათ, რომ „ქართველ ხალხს ხმები მოჰპარეს", – წერს BBC.

BBC-ის სტატიაში ოპოზიციის ლიდერების, ნიკა გვარამიას და თინა ბოკუჩავას კომენტარებიც მოჰყავს.

"ჩვენ არ ვაღიარებთ ამ გაყალბებული არჩევნების შედეგებს", – განაცხადა ერთიანი ნაციონალური მოძრაობის თავმჯდომარემ, თინა ბოკუჩავამ.

ოპოზიციის კიდევ ერთმა ლიდერმა, ნიკა გვარამიამ განაცხადა, რომ ქართულმა ოცნებამ "საკონსტიტუციო გადატრიალება" მოაწყო.

BBC აღნიშნავს, რომ მანამდე როგორც ქართულმა ოცნებამ, ისე ოთხმა პროევროპულმა ოპოზიციურმა ჯგუფმა ეგზიტპოლებზე დაყრდნობით გამარჯვება გამოაცხადეს.