ერთიანობა-ნაციონალური მოძრაობა არჩევნების შედეგებს არ აღიარებს. ენმ-ის თავმჯდომარის, თინა ბოკუჩავას განცხადებით, ეგზიტპოლებით დიდი უპირატესობით გამოჩნდა პროდასავლური ოპოზიციის გამარჯვება.

"ცესკომ შეასრულა ივანიშვილის ბინძური დაკვეთა და გამოაცხადა შედეგი, რომელიც აჩვენებს, რომ ოლიგარქმა ივანიშვილმა ქართველ ხალხს გამარჯვება მოპარა და ამით მოპარა ევროპული მომავალი. ერთიანობა-ნაციონალური მოძრაობის სახელით ვაცხადებთ, რომ არჩევნების შედეგებს არ ვიღებთ და მიტაცებული შედეგის აღიარებას არ ვაპირებთ.

იმედია, ამგვარი პოზიცია იქნება სრულიად ოპოზიციურ ველზე, რადგან მიგვაჩნია, რომ ის გამარჯვება, რომელიც დღეს მოიპოვა ქართველმა ხალხსმა, არ ეკუთვნის მხოლოდ რომელიმე ერთ პარტიას, არამედ, ერზე, ეკუთვნის მთლიანად ქვეყანას და მთლიანად ოპოზიციას, რომელსაც ერთობლივად მისცა ნდობის მანდატი ქართველმა ხალხმა.

ჩვენ ვიბრძოლებთ როგორც არასდროს ჩვენი ქვეყნის ევროპული მომავლის დასაბრუნებლად და არ შევეგუებით მოპარული არჩევნების შედეგს. უკვე შევხვდით ჩვენს პროევროპელ მომავალ კოალიციურ პარტნიორებს და დიახ, დარწმუნებული ვარ, რომ შემდეგი მთავრობა იქნება კოალიციური მთავრობა და დარწმუნებული ვარ, უახლოეს საათებში გავაკეთებთ განცხადებას, როგორ ვმოქმედებთ ამ შედეგის დასაცავად, რომელიც იყო დიდი გამარჯვება ჩვენი ქვეყნისთვის, რომლის მოპარვასაც ახლა ცდილობს რუსი ოლიგარქი ივანიშვილი, ჩვენ არ ვთმობთ ჩვენს ევროპულ მომავალს და არ ვიღებთ მოპარულ საარჩევნო შედეგს, რომელსაც ავრცელებს ცენტრალური საარჩევნო კომისია" – განაცხადა ბოკუჩავამ.