თურქეთის მთავრობამ განაცხადა, რომ 23 ოქტომბრის ღამით სირიასა და ერაყში თურქეთის არმიამ ქურთული პარამილიტარისტული ჯგუფის, ქურთისტანის მუშათა პარტიის (PKK) პოზიციებზე მიიტანა იერიში.

თურქეთი ანკარის მახლობლად მომხდარი ტერორისტული აქტის ორგანიზებაში სწორედ PKK-ს ადანაშაულებს, მიუხედავად იმისა, რომ თავდასხმაზე პასუხისმგებლობა ჯერ არავის აუღია.

23 ოქტომბერს გავრცელებულ ვიდეოში ჩანს, როგორ ისვრის ორი ადამიანი ავტომატური ცეცხლსასროლი იარაღიდან თურქეთის საჰაერო ინდუსტრიის (TAI) თანამშრომლების მიმართულებით — თავდასხმას, სულ მცირე, 5 ადამიანი ემსხვერპლა, 22 კი დაიჭრა.

"32 სამიზნე, რომელიც ტერორისტებს ეკუთვნოდათ, წარმატებით განადგურდა", — განაცხადა თურქეთის თავდაცვის სამინისტრომ.

თურქეთის შინაგან საქმეთა მინისტრის ცნობით, ორივე თავდამსხმელი ლიკვიდირებულია. ტერორისტები TAI-ს ტერიტორიაზე ტაქსით მივიდნენ — ერთ-ერთი მსხვერპლი სწორედ ტაქსის მძღოლია.

ქურთისტანის მუშათა პარტია თურქეთში აკრძალულია და ტერორისტული ორგანიზაციის სტატუსი აქვს მინიჭებული აშშ-სა და გაერთიანებულ სამეფოში. PKK ქურთი უმცირესობის უფლებებისათვის მებრძოლ ორგანიზაციად პოზიციონირდება და თურქეთს 1980-იანი წლებიდან უპირისპირდება.