ყაზახეთი უახლოეს მომავალში BRICS-ში გაწევრიანებისთვის განაცხადის შეტანისგან თავს შეიკავებს, – ამის შესახებ ინფორმაცია ყაზახეთის პრეზიდენტ, ყასიმ-ჟომარტ ტოყაევის პრესმდივანმა გაავრცელა.

"ყაზახეთი უახლოეს მომავალში BRICS-ში გაწევრიანებისთვის განაცხადის შეტანისგან თავს შეიკავებს, მათ შორის, გაწევრიანების საკითხის განხილვის ხანგრძლივი პროცესისა და სხვა რიგი საკითხების გამო, რომლებიც ამ ასოციაციის განვითარების პერსპექტივებს უკავშირდება", - განაცხადა ყაზახეთის პრეზიდენტის პრესმდივანმა.

მისივე თქმით, "ყაზახეთის პრეზიდენტმა მიიღო წინადადებები BRICS-ში - განვითარებადი ეკონომიკის მქონე სახელმწიფოების ასოციაციაში გაწევრიანების შესახებ, თუმცა, ამჟამად, ეროვნული ინტერესების გათვალისწინებით, ის პრიორიტეტს ანიჭებს გაერო-ს „როგორც უნივერსალურ და უალტერნატივო ორგანიზაციას, რომელშიც შესაძლებელი და აუცილებელია ყველა აქტუალური საერთაშორისო პრობლემის განხილვა".

ყაზახეთის პრეზიდენტის პრესსამსახურის ინფორმაციით, მომავალ კვირას დაგეგმილ BRICS-ის სამიტში ყასიმ-ჟომარტ ტოყაევი მონაწილეობას მიიღებს.