უძველეს ქალაქ პეტრაში არქეოლოგებმა საიდუმლო სამარხი აღმოაჩინეს, სადაც სულ მცირე 12 ადამიანის ჩონჩხი და არტეფაქტებია, რომლებიც სავარაუდოდ, 2000 წლისაა.

არქეოლოგთა ჯგუფს ამერიკის კვლევის ცენტრის აღმასრულებელი დირექტორი, დოქტორი პირს პოლ კრეასმანი ხელმძღვანელობდა. ამ ადგილას არქეოლოგიური გათხრები ჯერ კიდევ 2003 წელს დაიწყო, როდესაც ძეგლის მარცხენა მხარეს ორი სამარხი აღმოჩნდა.

ფოტო: CNN

გადამღებ ჯგუფთან ერთად არქეოლოგებმა ახლად აღმოჩენილი საფლავი აგვისტოში გათხარეს. მაგრამ ნამდვილი სიურპრიზი აღმოჩნდა ის, რაც საფლავში იყო. მიუხედავად იმისა, რომ პეტრაში აღმოჩენილი მრავალი სამარხი ცარიელი აღმოჩნდება ხოლმე, ეს სამარხი სავსე იყო ადამიანის ჩონჩხებითა და ბრინჯაოს, რკინისა და კერამიკისგან დამზადებული ნივთებით. კრეასმენის თქმით, აღნიშნული ხელუხლებელი სამარხის აღმოჩენა იშვიათ ცნობებს იძლევა ნაბატეელების, ძველი არაბი მომთაბარეების შესახებ, რომელთა სამეფო აყვავებული იყო ჩვენს წელთაღრიცხვამდე მეოთხე საუკუნეში.

ფოტო: CNN

"ეს ძალზე იშვიათი აღმოჩენაა, პეტრაში არქეოლოგებს ორი საუკუნის განმავლობაში მსგავსი არაფერი აღმოუჩენიათ. მსოფლიოში ერთ-ერთი ყველაზე ცნობილი შენობის წინაც კი ჯერ კიდევ უზარმაზარი აღმოჩენებია გასაკეთებელი", — აღნიშნავენ მკვლევრები.

პეტრაში გასული რამდენიმე ათწლეულის განმავლობაში აღმოჩენილი მხოლოდ რამდენიმე სამარხი იყო ხელუხლებელი.

"ჩვენ იმედი გვაქვს, რომ ვიპოვეთ ის, რაც უფრო მეტს გვეტყვის უძველესი ხალხისა და ამ ადგილის შესახებ — ადამიანის ნაშთები შეიძლება იყოს მართლაც ღირებული ინსტრუმენტი ამ მხრივ", — თქვა კრეასმანმა.