"დემოკრატიის კვლევის ცენტრის" ხელმძღვანელმა, უჩა ნანუაშვილმა ჟურნალისტებთან საუბარში "უცხოური გავლენის გამჭვირვალობის შესახებ" კანონზე საკონსტიტუციო სასამართლოს გადაწყვეტილება შეაფასა. ნანუაშვილმა აღნიშნა, რომ სასამართლო საკმარისი დრო და რესურსი ჰქონდა იმისათვის, რომ განსხვავებული გადაწყვეტილება მიეღო.

"მადლობა იმ ორ მოსამართლეს, ვინც მიიღო ის გადაწყვეტილება, რომელიც უნდა მიეღო დამოუკიდებელ მოსამართლეს. დანარჩენ შემთხვევაში, სამწუხაროა, რომ სასამართლოს წევრთა უმრავლესობამ ვერ დაინახა სერიოზული რისკები და საფრთხეები, რომელიც რუსული კანონის მიღებამ შექმნა ქვეყანაში. სასამართლომ, ორი ადამიანის გარდა ის დამოუკიდებლობის ხარისხიც დაკარგა, რომელიც მანამდე საზოგადოებაში ჰქონდა. სამწუხაროა, რომ ეს მოხდა. საკმარისი დრო და რესურსი ჰქონდათ სხვა გადაწყვეტილება რომ მიეღოთ. სასამართლოს უნდა დაენახა ის წინააღმდეგობა კონსტიტუციასთან, რომელიც მიღებულ კანონში არსებობს", — განაცხადა უჩა ნანუაშვილმა

შეგახსენებთ, რომ საქართველოს საკონსტიტუციო სასამართლომ "უცხოური გავლენის გამჭვირვალობის შესახებ" კანონის შეჩერების მოთხოვნა არ დააკმაყოფილა, თუმცა წარდგენილი სარჩელები ნაწილობრივ დასაშვებად ცნო, რაც ნიშნავს, რომ მათი არსებითი განხილვები დაიწყება.