რუსთავი 2-ზე გიორგი გაბუნიას გადაცემაში ირაკლი ალასანიამ ქვეყნის ყოფილი პრემიერი ბიძინა ივანიშვილი სასამართლოზე ზეწოლაში დაადანაშაულა და ის მიხეილ სააკაშვილს შეადარა.

"გული მწყდება, რომ 2012 წელს, ჩვენ ერთად შევცვალეთ სააკაშვილის ხელისუფლება, რომელიც სასამართლოს აკონტროლებდა და პროკურატურით ზემოქმედებდა ბიზნესზე და საზოგადოებაზე" - თქვა ალასანიამ.

გვახსოვს იმედში როგორ შევიდა სპეცდანიშნულების ძალები, ივანიშვილი კი იყენებს რბილ ძალას და სასამართლოსა და პროკურატურის ხელით აკეთებს ამ ყველაფერს

ირაკლი ალასანია

თავისუფალი დემოკრატების ლიდერმა აღნიშნა, რომ ყოფილი პრემიერი, ბიძინა ივანიშვილი, მიხეილ სააკაშვილისგან განსხვავებით რბილ ძალას, სასამართლოს, იყენებს:

"გვახსოვს იმედში როგორ შევიდა სპეცდანიშნულების ძალები, ივანიშვილი კი იყენებს რბილ ძალას და სასამართლოსა და პროკურატურის ხელით აკეთებს ამ ყველაფერს, თითქოს დამოუკიდებელი გადაწყვეტილებები არის მიღებული".

ალასანია მიიჩნევს, რომ ქართულ საზოგადოებასთან მსგავსი მოქცევა ივანიშვილის "აღარ გაუვა" და ოქტომბრის არჩევნები ქართული ოცნებისთვის გადამწყვეტი იქნება.

"ღირებულებებით აცდენილია ეს ადამიანი [ბიძინა ივანიშვილი] და მისი გუნდი საქართველოს ისეთ მომავალს, როგორიც ჩვენ გვინდა, ამიტომ ოქტომბრის არჩევნებზე საზოგადოება უნდა დაირაზმოს და ივანიშვილის ხელისუფლება ოპოზიციაში გადაიყვანოს" - განაცხადა თავისუფალი დემოკრატების ლიდერმა.

თბილისის სააპელაციო სასამართლომ 10 ივნისს გამოაცხადა თავისი გადაწყვეტილება და ძალაში დატოვა საქალაქო სასამართლოს მოსამართლის, თამაზ ურთმელიძის, გადაწყვეტილება, რომლის მიხედვითაც რუსთავი 2-ის წილები ქიბარ ხალვაშის კუთვნილებაში გადადის.

თბილისის სააპელაციო სასამართლომ რუსთავი 2-ის საქმის განხილვა 7 ივნისს დაასრულა.