შესწორება: მასალის თავდაპირველი სათაური არასწორი იყო და შეიცვალა. კერძოდ, სტატიას ერქვა — "პაველ ჰერჩინკი: საქართველოს ხელისუფლების წევრები შეუთავსებლები არიან ევროკავშირის ღირებულებებთან" — რაც არასწორია, რადგან პაველ ჰერჩინკი საუბრობდა არა საქართველოს ხელისუფლების წევრებზე, არამედ საქართველოს პარლამენტისა და საქართველოს მთავრობის მიერ მიღებულ გადაწყვეტილებებზე. სტატია მომზადდა მთავარი არხის მიერ გავრცელებულ თარგმანზე დაყრდნობით. (მოგვიანებით მთავარმა არხმა აღნიშნული ინფორმაცია ჩაასწორა).

NEWS.On.ge ბოდიშს უხდის მკითხველს გადაუმოწმებელი ინფორმაციის გაშუქებისთვის.

დღეს, საქართველოში ევროკავშირის ელჩი, პაველ ჰერჩინკის თავისუფალ უნივერსიტეტში იმყოფებოდა, სადაც სტუდენტებთან შეხვედრაზე საქართველოს საგარეო კურსსა და ევროკავშირში ინტეგრაციის პერსპექტივაზე ისაუბრა.

ინტერპრესნიუსის თარგმანის მიხედვით, ელჩმა განაცხადა, რომ მას შემდეგ, რაც საქართველო კანდიდატი ქვეყანა გახდა, მთავრობამ ბევრი საკამათო გადაწყვეტილება მიიღო, რაც "საქართველოს აშორებს ევროკავშირის წევრობისგან".

"მაგრამ რა მოხდა მას შემდეგ, რაც საქართველო კანდიდატი ქვეყანა გახდა? მას შემდეგ, რაც გადავწყვიტეთ, რომ მზად ვართ, გულში ჩაგიკრათ? ბევრი რთული, საკამათო გადაწყვეტილების მიღება მოხდა თქვენი ქვეყნის, თქვენი მთავრობის მიერ, რომლებმაც იმის ნაცვლად, რომ საქართველო უფრო დაეახლოებინა საქართველოს მოსახლეობის 90 პროცენტის ოცნებასთან — ევროკავშირში გაწევრიანებასთან დაკავშირებით, საქართველოს აშორებს ევროკავშირის წევრობისგან. ძალიან ბევრი გადაწყვეტილება და ინიციატივა, რომელიც მიიღეს საქართველოს პარლამენტმა, საქართველოს მთავრობამ წინააღმდეგობაშია ევროკავშირის ძირითად ღირებულებებთან", — განაცხადა ელჩმა.