დღეს გავრცელდა ინფორმაცია, რომ ქართველმა თავისუფალი სტილით მოჭიდავეებმა 1-2 ოქტომბერს ვლადიკავკაზში გამართულ შეჯიბრებაში მიიღეს მონაწილეობა. ტურნირში რუსების გარდა, მონაწილეობდნენ სპორტსმენები საქართველოს ოკუპირებული რეგიონებიდან – აფხაზეთიდან და ცხინვალის რეგიონიდანაც. ორივე ოკუპირებული რეგიონი ტურნირზე დამოუკიდებელ სახელმწიფოდ იყო წარმოდგენილი.

პუბლიკა ავრცელებს ჭიდაობის ფედერაციის კომენტარს, სადაც განაცხადეს, რომ მოჭიდავეებმა გადაწყვეტილება თვითნებურად მიიღეს და ფედერაცია ამის შესახებ ინფორმირებული არ ყოფილა. მოჭიდავეები არ სარგებლობდნენ სახელმწიფოს დაფინანსებითაც.

ფედერაციის განცხადებით, ეს მოჭიდავეები ნაკრების წევრები არ არიან და სადისციპლინო ზომების შესახებ მოგვიანებით იმსჯელებენ.