სატელევიზიო რეკლამების აკრძალვა მხოლოდ იმიტომ, რომ ამ რეკლამებში ხელისუფლების კრიტიკაა, არაკანონიერია, რაც იმაზე მეტყველებს, რომ ქართული ოცნება პანიკაშია. ამის შესახებ ძლიერი საქართველოს ერთ-ერთმა ლიდერმა, ალეკო ელისაშვილმა ბრიფინგზე განაცხადა. მისივე თქმით, მოქალაქეები მათთვის განკუთვნილი უფასო სარეკლამო დროით სარგებლობის გამო 10 000 ლარით დაჯარიმდნენ.

დეპუტატის განცხადებით, ასევე კოალიცია ,,ძლიერი საქართველოს“ სარეკლამო რგოლის გაშვებაზე უარი თქვა ტელეკომპანია იმედმა მხოლოდ იმიტომ, რომ რეკლამა იწყება შემდეგი ფრაზით, ქართულმა ოცნებამ არ შეასრულა თავისი დაპირებები“. როგორც ელისაშვილი აღნიშნავს, ქართული ოცნება რეკლამის აკრძალვის აბსურდულ მიზეზს ასახელებს - მათ უნდა დაამტკიცონ, რომ დაპირებები ნამდვილად არ შესრულდა. მისივე თქმით, მათ შეუძლიათ პირდაპირ ხალხს კითხონ, რადგან ხალხმა ოცნების შეუსრულებელი დაპირებების შესახებ ისედაც კარგად იცის.

"ჩვენ ვხედავთ, როგორი დაფეთებულია ქართული ოცნება და შიშისგან და პანიკისგან ათას სისულელეს და ათას უკანონობას სჩადიან. ორი დღის წინ ხელისუფლების მთავარმა პროპაგანდისტულმა რუპორმა, ტელეკომპანია იმედმა შეაჩერა ჩვენი კოალიციის, ძლიერი საქართველოს სარეკლამო, საარჩევნო კლიპი სრულიად აბსურდული მიზეზით. კლიპი იწყება ასეთი ფრაზით, რომ ქართულმა ოცნებამ არ შეასრულა საარჩევნო დაპირებები. ამ ერთი ფრაზის გამო დაგვიწესეს ცენზურა და შეაჩერეს კლიპი. მიზეზად მოაქვთ ის, როგორ დაამტკიცებთ, რომ არ შეასრულაო? ახალი პოლიტიკური ანეკდოტი, ქართულმა ოცნებამ და ბიძინა ივანიშვილმა ყველაფერში გადაგვაგდეს, რასაც დაგვპირდნენ და კიდევ ჩვენ უნდა დავამტკიცოთ, რომ სინამდვილეში გადაგვაგდეს? აბა გავიხსენოთ, 5 მილიონი თითოეულ სოფელს, ხო თქვა ბიძინა ივანიშვილმა? თქვა. ხო ამბობდა, როგორც კი ხელისუფლებაში მოვალთ ბენზინის ფასი განახევრდებაო — განახევრდა? წყალი, გაზი, ელექტროენერგია უფასო იქნებაო, საჯარო მოხელე ვერ იცხოვრებს საშუალო ქართველ მოსახლეზე უკეთესადო, 100 ქარხანაო, უფასო გრძელვადიანი ფულიო... ყველამ ხომ ვიცით, რომ აქედან არცერთი დაპირება არ შეასრულა, და ახლა ჩვენ გვედავებიან, დაამტკიცეთ, რომ არ შესრულდაო.

მათ უბრალოდ შეუძლიათ ხალხს კითხონ. ხალხმა ძალიან კარგად იცის, რომ ბიძინა ივანიშვილს არასდროს შეუსრულებია 100 ქარხნის დაპირება, ან დაპირება უფასო ფულთან დაკავშირებით. ან დაპირება, რომ ფასები შემცირდებოდა. და ასე შეგვიძლია გავაგრძელოთ დაუსრულებლად. ზოგადად, ქართველები ბევრ რამეზე ვერ ვთანხმდებით, მაგრამ ქართული ოცნების ამომრჩევლებმაც კი იციან, რომ ბიძინას საკუთარი დაპირებები არ შეუსრულებია.

ქართული ოცნების მიერ ამ რეკლამის აკრძალვა არის მორიგი თავდასხმების სერია ჩვენს დემოკრატიაზე, რაც უბრალოდ მხოლოდ ქართული ოცნების პანიკაზე მეტყველებს. მათ დააკავეს და სცემეს ჩვენი მხარდაჭერები, აქტივისტები. ისინი ურეკავენ და თავისი ჭკუით აშინებენ ოპოზიციურ ლიდერებს, აქტივისტებს. ოპოზიციის და არასამთავრობო ორგანიზაციების დევნისთვის, იყენებენ ანტიკორუფციულ ბიუროს.

მათ არაკანონიერად აკრძალეს სატელევიზიო რეკლამები, მხოლოდ იმიტომ, რომ ამ რეკლამებში ხელისუფლებას ვაკრიტიკებდით. პარტია მოქალაქეებს შეუზღუდეს და აუკრძალეს რეკლამის გაშვება, მეტიც სასამართლომ დააჯარიმა კიდეც იმ რეკლამის გამო, რომელიც უბრალოდ ხალხს ბიძინა ივანიშვილის შეუსრულებელ დაპირებებს ახსენებდა. ეს ყველაფერი ადასტურებს იმას, რომ ოცნებამ იცის, რომ მხოლოდ 26 დღე დარჩა.

მოვუწოდებთ ჩვენს მეგობრებს და საერთაშორისო პარტნიორებს, გაითვალისწინონ: ქართული ოცნება არის პანიკაში, რის გამოც ისინი სულ უფრო და უფრო ექსტრემალურ ნაბიჯებს დგამენ, რათა ქართველთა უმრავლესობამ არ გამოავლინოს თავისი დემოკრატიული ნება. ყველამ უნდა იცოდეს რაც ხდება", — განაცხადა ალეკო ელისაშვილმა.