ბახმაროს გადარჩენის საინიციატივო ჯგუფის წარმომადგენელი არმაზ ახვლედიანი ინტერპრესნიუსთან აცხადებს, რომ სამშენებლო კომპანია ბახმაროში მშენებლობის დასაწყებად გარკვეულ სამუშაოებს შენიღბულად ახორციელებს მიუხედავად ამისა, მრავალბინიანი კომპლექსის აშენების უფლებას არ მისცემენ და ამ ფაქტს შეეწინააღმდეგებიან.

"სამშენებლო კომპანია ჩასაფრებულია და ელოდება ხელსაყრელ მომენტს, რომ დაიწყოს სამშენებლო პროცესი, მე ხშირად ვარ ხოლმე ბახმაროში და ვიცნობ სიტუაციას. კომპანია ყველანაირად ცდილობს, რომ სახელმწიფოს მიერ ერთ ლარად ნაჩუქარი მიწიდან, ბახმაროს დასამარების ხარჯზე, იშოვოს მილიონები. რა შეაჩერებს იმ მტაცებელ კომპანიას, რომელმაც დაასამარა ბათუმი და ახლა მიადგა ბახმაროს?! ელოდება ხელსაყრელ მომენტს, ჩვენ შევეწინააღმდეგებით, ჩვენ არ დავუშვებთ! ჩვენ, აქტივისტები შევეწინააღმდეგებით!" — განაცხადა არმაზ ახვლედიანმა.

ბახმაროში ახალი მრავალფუნქციური სასტუმრო კომპლექსის მშენებლობას სამშენებლო კომპანია ორბი გეგმავს. პროექტისთვის გამოყოფილია 8 ჰექტარი მიწა, აქედან 7 ჰექტარზე უნდა მოეწყოს რეკრეაციული ზონა, 1 ჰექტარზე — სასტუმრო კომპლექსის შენობა.

მიმდინარე წლის თებერვალში ორბი ჯგუფის გენერალურმა დირექტორმა, ირაკლი კვერღელიძემ ტელეკომპანია იმედის ეთერში განაცხადა, რომ ეს პროექტი იქნება ერთგვარი ლოკომოტივი კურორტის განვითარებისთვის, საფუძველი დამატებითი სამუშაო ადგილების შექმნისთვის, დამატებითი ტურისტული ნაკადების გაზრდისთვის და ახალი ინფრასტრუქტურისთვის.

კომპლექსის დასრულების ვადა 2025 წლის დეკემბერი იყო, თუმცა მთავრობის განკარგულებით 2 წლით გახანგრძლივდა და 2027 წლის 31 დეკემბერი განისაზღვრა. საინიციატივო ჯგუფის ბახმაროს გადარჩენისთვის წარმომადგენლები პროექტის სრულად შეჩერებას ითხოვენ. მათ ამ მოთხოვნით პეტიციაც კი შექმნეს.