თუ საქართველოს ხელმძღვანელობა ასეთივე სულისკვეთებით გააგრძელებს, წარსულის გადალახვაში პოზიტიურ შედეგებს ვერ მივაღწევთ, — ასე ეხმაურება ოკუპირებული აფხაზეთი ე.წ. საგარეო საქმეთა სამინისტრო გაერო-ს გენერალური ასამბლეის 79-ე სესიაზე საქართველოს პრემიერ-მინისტრ ირაკლი კობახიძის სიტყვით გამოსვლას.

"გავეცანით საქართველოს პრემიერ-მინისტრის, ირაკლი კობახიძის განცხადებას გაერო-ს გენერალური ასამბლეის 79-ე სესიაზე. კიდევ ერთხელ მოვისმინეთ საქართველოს ხელმძღვანელობის არაერთხელ გამეორებული რიტორიკა, ერთი და იმავე მითიური ტერმინებით. მიგვაჩნია, რომ თუ საქართველოს ხელმძღვანელობა ასეთივე სულისკვეთებით გააგრძელებს, წარსულის გადალახვაში პოზიტიურ შედეგებს ვერ მივაღწევთ", — ნათქვამია ე.წ. საგარეო საქმეთა სამინისტროს განცხადებაში.

შეგახსენებთ, რომ 25 სექტემბერს ირაკლი კობახიძემ გაეროს გენერალურ ასამბლეაში სიტყვით გამოსვლისას განაცხადა, რომ "უნდა აღვადგინოთ ყველა დანგრეული ხიდი ჩვენს ქვეყანაში" და ხელისუფლების ყველა ნაბიჯი მიმართულია იმისკენ, რომ ერთად შევძლოთ ცხოვრება ბედნიერ, გაერთიანებულ და განვითარებულ საქართველოში".

"მინდა, ვისარგებლო ამ შესაძლებლობით და მივმართო ჩვენს ხალხს საოკუპაციო ხაზის მეორე მხარეს, აფხაზეთისა და ცხინვალის რეგიონებში. ჩვენი ყველა ნაბიჯი მიმართულია იმისკენ, რომ დავეხმაროთ ჩვენს ხალხს და ერთ დღეს ჩვენ, ჩვენს შვილებთან ერთად, შევძლოთ ერთად ცხოვრება ბედნიერ, გაერთიანებულ და განვითარებულ საქართველოში. საოკუპაციო ხაზის ამ მხარეს ჩვენ ყოველთვის გულღიად მიგიღებთ. ჩვენ უნდა აღვადგინოთ ყველა დანგრეული ხიდი ჩვენს ქვეყანაში," — განაცხადა პრემიერმა.

კობახიძის გაეროში გაკეთებულ განცხადებას უკვე გამოეხმაურა ოკუპირებული სამხრეთ ოსეთის ე.წ. საგარეო უწყება. ისინი იმ გეოპოლიტიკური რეალობის აღიარებას ითხოვენ, რომელიც 2008 წლის აგვისტოს შემდეგ გაჩნდა.