2000-იან წლებში და უფრო გვიანაც, ლედი გაგა პოპკულტურის ერთ-ერთი ყველაზე განხილვადი ფიგურა გახლდათ. პროვოკაციული ნაბიჯებით ცნობილ მომღერალზე უამრავ ჭორსაც თხზავდნენ; მათგან ერთ-ერთი ყველაზე პოპულარული კი მის გენდერს უკავშირდებოდა — თითქოს, ლედი გაგა კაცი იყო. იმის მიუხედავად, რომ ამ ჭორს თავად პოპვარსკვლავიც გადააწყდა ინტერვიუებში, მასზე ზუსტი პასუხის გაცემა არასდროს უცდია.

ამ საკითხს პოპვარსკვლავი ცოტა ხნის წინ კიდევ ერთხელ შეეხო ნეტფლიქსის ახალ დოკუმენტურ სერიალში, რომელსაც ტექმაგნატი ბილ გეიტსი უძღვება.

"20 წელს ახალგადაცილებული რომ გახლდით, ვრცელდებოდა ჭორი, თითქოს, კაცი ვიყავი", — უყვება გაგა გეიტსს, — "მთელ მსოფლიოში დავდიოდი, ტურნეებს ვაწყობდი, ჩემს სიმღერებს ვუწევდი პოპულარიზაციას და ლამის ყველა ინტერვიუში მეუბნებოდნენ, რომ ინტერნეტში გავრცელდა მორიგი დამახინჯებული ფოტო; მერე კი მეკითხებოდნენ, ხმები დადის, რომ კაცი ხართ და ამაზე რას იტყვითო?".

ერთ-ერთი ასეთი ინტერვიუ ინტერნეტარქივსაც შემორჩა. 2011 წელს, CNN-ის ჟურნალისტმა ანდერსონ კუპერმა გაგას ჰკითხა, არსებობს ჭორი, რომ კაცის სასქესო ორგანო გაქვთო.

"შეიძლება მაქვს კიდეც", — განაცხადა მაშინ პოპვარსკვლავმა, — "რა, ცუდი იქნება?! რატომ უნდა შევიწუხო თავი პრესისთვის იმის ახსნით, მაქვს თუ არა პენისი? ეს არც მე არ მადარდებს და არც ჩემს ფანებს".

აი, გეიტსთან საუბარში კი, ლედი გაგამ აღნიშნა, რომ შეკითხვაზე პასუხისგან განზრახ იკავებდა თავს.

"არ მინდოდა, რომ მეპასუხა, რადგან ამ ტყუილის მსხვერპლად დიდად არ ვგრძნობდი თავს", — ამბობს მომღერალი, — "თუმცა, იმაზე კი მეფიქრებოდა, იქნებ, რომელიღაც ბავშვს ასეთივე ხმებს უვრცელებენ და ახლა ნახავს, რომ ცნობილი ადამიანი ამის გამო თავს შერცხვენილად გრძნობს-მეთქი.

"იმას ვამბობ, რომ ზოგიერთ სიტუაციაში ჭორის გაქარწყლება სხვებისთვის არცთუ სასიკეთო იქნებოდა. ამ შემთხვევაში, ვეცადე, პროვოკაციული, სხვაგვარად დამაფიქრებელი რამ მეთქვა და დეზინფორმაცია ნორმის მოსარღვევად გამომეყენებინა".