დღეს, 25 სექტემბერს, პროკურატურამ “ქურდული სამყაროს” წევრობის, “ქურდული სამყაროს” საქმიანობის მხარდაჭერისა და “ქურდული სამყაროს” წევრისთვის მიმართვის ფაქტებზე 5 პირს ბრალი წარუდგინა.

შსს-ის გამოძიებით დადგინდა, რომ ორ პირს შორის მშენებლობასთან დაკავშირებულ საკითხებზე ფინანსური დავა წარმოიშვა. დავის გადაწყვეტის მიზნით ბრალდებულებმა ქურდული სამყაროს ორ წევრს მიმართეს.

ფინანსური დავის “ქურდული გარჩევის” გზით გადაწყვეტაში ასევე, ჩართული იყო “ქურდული სამყაროს” მხარდამჭერი პირი

2024 წლის 22 ივნისს, ოზურგეთში, “ქურდული სამყაროს” წევრებმა მოდავე მხარეების და “ქურდული სამყაროს” მხარდამჭერის მონაწილეობით, “ქურდული გარჩევა” მოაწყვეს, რის შედეგადაც მ.გ.-ს მოდავე მხარის სასარგებლოდ 15 000 ლარის გადახდა დააკისრეს, რომელიც მან დათქმულ ვადაში გადაიხადა.

თანხის ნაწილი დავის გაწყვეტაში მონაწილე “ქურდული სამყაროს” წევრებს შორის გადანაწილდა.

სამართალდამცავებმა ბრალდებულები 24 სექტემბერს დააკავეს. 2 პირს ბრალდება საქართველოს სისხლის სამართლის კოდექსის 223-ე პრიმა მუხლის პირველი ნაწილით (“ქურდული სამყაროს” წევრობა) წარედგინა, რაც სასჯელის სახედ 7-დან 10 წლამდე თავისუფლების აღკვეთას ითვალისწინებს.

1 პირს — სისხლის სამართლის კოდექსის 223³-ე მუხლის მე-2 ნაწილით (“ქურდული სამყაროს” საქმიანობის მხარდაჭერა), რაც 3-დან 6 წლამდე თავისუფლების აღკვეთას გულისხმობს.

2 პირს — სისხლის სამართლის კოდექსის 223⁴-ე მუხლის პირველი ნაწილით („ქურდული სამყაროს“ წევრისთვის მიმართვა), რაც სასჯელის სახედ 3-დან 7 წლამდე თავისუფლების აღკვეთას ითვალისწინებს.

პროკურატურა ბრალდებულებისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.

პროკურატურა ორგანიზებული დანაშაულის წინააღმდეგ მკაცრ სისხლის სამართლის პოლიტიკას ატარებს, რასაც მომავალშიც გააგრძელებს.