"საქართველოს გაერთიანების მატარებელმა აფხაზეთთან და სამხრეთ ოსეთთან დიდი ხანია ჩაიარა”, — ამის შესახებ რუსეთის სახელმწიფო სათათბიროს დსთ-ს, ევრაზიულ ინტეგრაციასა და თანამემამულეებთან ურთიერთობის კომიტეტის თავმჯდომარის პირველმა მოადგილემ, კონსტანტინე ზატულინმა განაცხადა. მან კომენტარი ქართული ოცნების მიერ "ოსი ძმებისა და დებისთვის" ბოდიშის მოხდასთან დაკავშირებით გააკეთა.

"არჩევნების წინ მმართველმა პარტია ქართულმა ოცნებამ ახალი მიდგომის შესახებ განაცხადა. კერძოდ, ბოდიშის მოხდა სურთ ოსებისთვის საქართველოს ექს-პრეზიდენტ მიხეილ სააკაშვილის 2008 წელს განხორციელებული აგრესიის გამო. ეს გაკეთდა არა მხოლოდ საერთაშორისო, არამედ ძირითადად შიდა პოლიტიკური მიზეზების გამო. ამიტომ ისინი ცდილობენ, ამომრჩევლის ყურადღება მიიპყრონ იმ ჩიხზე, რომელშიც სააკაშვილმა ქვეყანა მიიყვანა ამ აგრესიით", — ამის შესახებ კონსტანტინე ზატულინმა განაცხადა.

მისი თქმით, თბილისს არ უნდა ჰქონდეს იმედი, რომ "აფხაზები და ოსები მზად იქნებიან საქართველოში დასაბრუნებლად".

"ამ მატარებელმა დიდი ხნის წინ ჩაიარა. აფხაზეთისა და სამხრეთ ოსეთის საქართველოში დაბრუნება არ მოხდება. რუსეთი არანაირად არ მოახდენს ზეწოლას, და გავლენას რესპუბლიკების გადაწყვეტილებებზე, როგორც ზოგიერთს შეიძლება იმედი ჰქონდეს. ჩვენ სრულიად განსხვავებული მორალი და დამოკიდებულება გვაქვს აფხაზეთისა და სამხრეთ ოსეთის აღიარების მიმართ," — აცხადებს ზატულინი.