შოკოლადისფერი, ფუმფულა და თავაწეული პინგვინი, რომელიც მელბურნის აკვარიუმში ბინადრობს, სუპერვარსკვლავი პესტოა. პინგვინმა მუ დენგის რეკორდიც კი გადაფარა და თავი მილიარდობით ადამიანს გააცნო.

იანვარში დაბადებული პესტო თავიდან 200 გრამს იწონიდა, ცხრა თვის პინგვინის წონა კი ახლა 22.5 კგ-ია. ის ყველაზე დიდი პინგვინია, რაც კი მელბურნის აკვარიუმში ჰყოლიათ.

ეს წონა პინგვინებისთვის ნორმად აღიქმება, თუმცა მის მომვლელებს წარმოდგენაც არ ჰქონდათ, რომ პესტო ასეთი დიდი გახდებოდა.

ფუმფულა პინგვინი მადას არ უჩივის, დღეში რამდენჯერმე იკვებება და ყოველდღიურად 30-მდე თევზს ჭამს. როგორც აკვარიუმის თანამშრომლები აღნიშნავენ, ის საკმაოდ ჯანმრთელია და მალე ბუნებრივად დაიწყებს წონაში კლებას.

ფოტო: BBC

ამასთან, მისი მომვლელები პესტოს ტიპურ ბავშვს ადარებენ, რადგან ზრდასრული პინგვინების გაღიზიანება ძალიან უყვარს და ცოტა მავნებლურადაც იქცევა.

მიუხედავად იმისა, რომ აკვარიუმის თანამშრომლები დიდი ხანია უკვე განსაკუთრებით გატაცებულნი და შეყვარებულები არიან პესტოზე, მათი თქმით, საზოგადოებისგან წამოსული ასეთი ყურადღება და სიყვარული, მაინც უცხო გამოცდილება იყო.

ფოტო: People

ზოგადად, წელიწადის ეს დრო მელბურნის აკვარიუმისთვის საკმაოდ დატვირთულია, თუმცა განსაკუთრებით შეინიშნება ხალხმრავლობა იქ, სადაც პესტოა. ადამიანები მოდიან, რათა ფუმფულა და თავაწეულ პინგვინს პირადად შეხვდნენ.