როგორ შეიძლება, რაიმე ფაქტის კონსტატაციამ პრობლემა შეუქმნას არაღიარების პოლიტიკას, როდესაც თვითონ დანაშაულის ჩამდენ ხელისუფლებას ხელი აქვს მოწერილი იმაზე, რომ თავად დაიწყეს ომი 2008 წლის 7 აგვისტოს, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის ადმინისტრაციაში გამართულ პრესკონფერენციაზე განაცხადა.

"არაღიარების პოლიტიკას პრობლემა ვერ შეუქმნა იმ ფაქტმა, რომ თვითონ დანაშაულის ჩამდენმა რეჟიმმა თავად აღიარა საკუთარი დანაშაული. როგორ შეიძლება ფაქტის კონსტატაციამ რაიმე პრობლემა შექმნას ამ კუთხით. ოთხ სახელმწიფოს ჰქონდა სააკაშვილის რეჟიმის პირობებში აღიარებული ე.წ. დამოუკიდებლობა და ეს ოთხი დარჩა ოთხად სწორედ ჩვენი პოლიტიკის გამო. როგორ შეიძლება, რაიმე ფაქტის კონსტატაციამ შეუქმნას პრობლემა არაღიარების პოლიტიკას, როდესაც თვითონ დანაშაულის ჩამდენ ხელისუფლებას აქვს ხელი მოწერილი იმაზე, რომ თავად დაიწყეს ომი 2008 წლის 7 აგვისტოს", — განაცხადა პრემიერმა.

რამდენიმე დღის წინ, პარტია საქართველოსთვის ლიდერი, გიორგი გახარია ბიძინა ივანიშვილის განცხადებას გამოეხმაურა იმის შესახებ, რომ 2008 წლის ომი დასავლეთის, ევროპის და ამერიკის პროვოკაციის შედეგი იყო.

მისი თქმით, დასავლეთის დადანაშაულება 2008 წლის აგვისტოს ომის პროვოცირებაში, არაღაირების პოლიტიკას შესუსტდება.

"ივანიშვილი მზადაა, რომ ნებისმიერი ფასი გადაიხადოს იმაში, რომ ძალაუფლება შეინარჩუნოს. ისეთი რაღაცები ილაპარაკა, რომ ვიღაცის თავში შეიძლება გაჩნდეს აღქმა, რომ ეს ომი რუსეთის პროვოკაციის შედეგი და რუსეთს თავდასხმის შედეგი კი არ იყო, დასავლეთის, ევროპის და ამერიკის პროვოკაციის შედეგი იყო. იმხელა რისკის ქვეშ აყენებს ქვეყნის სუვერენიტეტსაც და ტერიტორიული მთლიანობის აღდგენის პერსპექტივასაც, რომ ამ ადამიანს ეს გააზრებული არ აქვს. და იმ ადამიანებს, რომლებიც გვერდით უდგანან, იმის თავი არ აქვთ დღეს, რომ ეს უთხრან.

როცა ადამიანს და სახელმწიფოებს, რომლებიც შენი სტრატეგიული პარტნიორები იყვნენ, რომლებიც იყვნენ ფუნდამენტი და საფუძველი არაღიარების პოლიტიკის, დღეს მათთან სტრატეგიულ პარტნიორობას გაწყვეტ, ათას სისულელეს დააბრალებ და ამასთან ერთად ეტყვი, რომ თქვენ იყავით პროვოკატორები ამ ომის დაწყებაშიო, მათი მოტივაცია ამიხსენით?

თუ არაღაირების პოლიტიკა შესუსტდება, რუსეთი რას იზამს? აჩუქებს რამეს საქართველოს? რა თქმა უნდა, არა. როდესაც ადამიანები ასეთ რაღაცებს ეთამაშებიან, მაშ ვამბობ მე ყოველთვის საჭიროა პასუხისმგებლობა.

უბრალოდ ვაჭრობთ, რომ დამატებით ხმა მიიღოთ არჩევნებზე და როგორმე თქვენი მოპარული ფულიც სადმე გააპაროთ და გადაარჩინოთ", — განაცხადა გახარიამ.