სოფელ შუქრუთის მაცხოვრებლების აქცია უწყვეტად უკვე 183 დღეა მიმდინარეობს. აქციის მონაწილეები 11 სექტემბერს თბილისში, პარლამენტის წინ, 19:00 საათზე აქციას გამართავენ.

ადგილობრივები ამბობენ, რომ ამ დროის განმავლობაში, ხელისუფლებიდან და ჯორჯიან მანგანეზიდან გამოხმაურება არ ჰქონიათ.

შუქრუთის მოსახლეებს მეთერთმეტე დღეა, რაც 5 პირამოკერილი აქციის მონაწილე ჰყავთ.

აქციის მონაწილეების თქმით, ჯორჯიან მანგანეზის მიერ ჩატარებულმა სამუშაოებმა მათი სახლები, ეზოები და ნაკვეთები დააზიანა.

6 სექტემბერს შპს მაღაროელმა აქციის მონაწილე 3 პირს — რომან მეგრელიშვილს, მალხაზ ლაბაძესა და გიორგი ცარციძეს სამსახური დაატოვებინა.

ცნობისთვის, მოსახლეობა ჯორჯიან მანგანეზის საქმიანობის შედეგად გარემოსა და საცხოვრებელ სახლებზე მიყენებულ ზიანს აპროტესტებს. ადგილობრივები აღნიშნავენ, რომ კომპანიის მიერ მადნის ღია კარიერული მოპოვების შედეგად, მნიშვნელოვანი ზიანი მიადგა გარემოს, დაზიანდა საცხოვრებელი სახლები, ეკლესია და სასაფლაოები.

აქციის მონაწილეებს სურთ, რომ კომპანიამ შეასრულოს ის ვალდებულებები, რომელიც 2021 წლის შეთანხმებით აქვს აღებული. კერძოდ, პროტესტის მონაწილეები მაღაროების მუშაობის გაჩერებასა და კომპენსაციების გაცემას მოითხოვენ.

ამავე თემაზე წაიკითხეთ აქ.