სოფელ შუქრუთის მცხოვრებლები უკვე 175 დღეა უწყვეტად აპროტესტებენ ჯორჯიან მანგანეზის მიერ წარმოებული სამუშაოების შედეგებს. აქციის მონაწილეების თქმით, კომპანიის საქმიანობის შედეგად დაინგრა მათი სახლები, დაზიანდა ნიადაგი, ეზოები და ნაკვეთები.

მიმდინარე კვირაში პროტესტის მონაწილეებმა პროტესტის უკიდურეს ფორმას მიმართეს — სამმა მათგანმა პირი ამოიკერა. მათ ხელისუფლებას რეაგირებისკენ და პროცესებში ჩართვისკენ მოუწოდეს. აქციის მონაწილეებმა მთავრობას პირველ სექტებრამდე მისცეს დრო პოზიციის დასაფიქსირებლად, წინააღმდეგ შემთხვევაში, მათი თქმით, პროტესტის უკიდურეს ფორმას კიდევ უფრო მეტი ადამიანი მიმართავდა.

ხელისუფლების მხრიდან პროტესტს არავინ გამოხმაურებია, რის გამოც, დღეს, 3 სექტემბერს აქციის კიდევ ერთმა მონაწილემ ამოიკერა პირი.

ამ დროისთვის პირამოკერილებთან ერთად კიდევ სამი ადამიანი შიმშილობს.

შეგახსენებთ, შუქრუთელებმა აქცია 24 აგვისტოს ჭორვილაში გამართეს, თუმცა სოფლის შესასვლელში მათ საპოლიციო ძალები, ასევე სოფლის მაცხოვრებლები დახვდნენ და სოფელში შესვლის საშუალება არ მისცეს.