2 სექტემბერს, საქართველოს პარლამენტის იურიდიულ საკითხთა კომიტეტმა მეორე მოსმენით დაუჭირა მხარი ე.წ ლგბტ პროპაგანდის წინააღმდეგ მიმართულ, ჰომოფობიურ კანონპროექტს „ოჯახური ღირებულებებისა და არასრულწლოვანის დაცვის შესახებ".

კანონპროექტის თანახმად, ქორწინება განისაზღვრება, როგორც "ოჯახის შექმნის მიზნით ქალისა და მამაკაცის ნებაყოფლობითი კავშირი, რომელიც საქართველოს კანონმდებლობით დადგენილ მოთხოვნებს აკმაყოფილებს", ხოლო "დაუშვებელია იმ ადამიანის მიერ არასრულწლოვანის შვილად აყვანა, რომელიც თავს არცერთ ბიოლოგიურ სქესს არ მიაკუთვნებს ან თავისი ბიოლოგიური სქესისგან განსხვავებულ სქესს მიაკუთვნებს ანდა მისი სექსუალური ორიენტაცია ჰეტეროსექსუალობის კატეგორიას არ განეკუთვნება".

"დაუშვებელია, საჯაროდ ისეთი შეკრება ან/და მანიფესტაციის ჩატარება, რომელიც მიმართულია ადამიანის თავისი ბიოლოგიური სქესისგან განსხვავებული სქესისთვის მიკუთვნების, ერთი და იმავე ბიოლოგიური სქესის წარმომადგენლებს შორის სექსუალური ორიენტაციის ნიშნით გამოხატული ურთიერთობის ან ინცესტის პოპულარიზაციისკენ".

"მაუწყებლობის შესახებ" კანონში დაგეგმილი ცვლილებებით, მაუწყებლები ვალდებული იქნებიან, არ გაავრცელონ ისეთი რეკლამა და ინფორმაცია, რომლებიც მიმართულია ლგბტ "ურთიერთობებისა და ინცესტის პოპულარიზაციისკენ", — ასევე, ვკითხულობთ კანონპროექტის ახალ რედაქციაში

კანონპროექტის ინიციირებაზე საუბარი ქართულმა ოცნებამ 2024 წლის წინასაარჩევნო პერიოდში დაიწყო, მათი ერთ-ერთი მთავარი დაპირება სწორედ "ოჯახური ღირებულებებისა და ქართული ტრადიციების დაცვაა". დაპირების შესრულების წინაპირობად პარტია, საპარლამენტო არჩევნებში საკონსტიტუციო უმრავლესობის მოპოვებასაც ასახელებს.

უფლებადამცველი ორგანიზაციები აღნიშნულ კანონპროექტში მრავალ საფრთხეს ხედავენ და ინიციატივას ადამიანის უფლებების, მათ შორის, გამოხატვის თავისუფლების, შეზღუდვისკენ გადადგმულ ნაბიჯად აფასებენ.

ევროინტეგრაციის საკითხზე მომუშავე ექსპერტთა სრული უმრავლესობა თანხმდება, რომ კანონპროექტი კანონად დამტკიცების შემთხვევაში მორიგი ბარიერი იქნება ქვეყნის ევროკავშირში გაწევრიანების გზაზე.

კანონპროექტთან დაკავშირებით ვენეციის კომისიამ კრიტიკული რეკომენდაციები გამოაქვეყნა და საქართველოს პარლამენტს მოუწოდა, მასზე მუშაობა აღარ გაეგრძელებინა.