ოკუპირებული აფხაზეთის ე.წ. პრეზიდენტმა, ასლან ბჟანიამ რუსეთის ფედერაციის ვიცე-პრემიერ ალექსანდრ ნოვაკთან შეხვედრაზე განიხილა რუსეთის მოქალაქეობის ჩამორთმევის საკითხი იმ ოპოზიციური ე.წ. დეპუტატებისთვის, რომლებიც აპარტამენტების შესახებ კანონპროექტს ეწინააღმდეგებიან, – ინფორმაციას ეხო-კავკაზა ავრცელებს.

ბჟანიასა და ნოვაკის შეხვედრის ოქმის მიხედვით, "გათვალისწინებულ იქნა აფხაზური მხარის (ა.გ. ბჟანიას) ვალდებულება, 2024 წლის 20 სექტემბრამდე მიაწოდოს ინფორმაცია სახალხო კრების — რესპუბლიკის პარლამენტის დეპუტატებისა და რუსეთის მოქალაქეობის მქონე აფხაზური ოპოზიციის ლიდერების შესახებ, რომლებიც რუსეთის ფედერაციის ინტერესებისა და რუსეთ-აფხაზური ურთიერთობების განვითარების მიზნების საზიანოდ მოქმედებენ, მათი რუსეთის მოქალაქეობის ჩამორთმევის საკითხის შემდგომი განხილვის მიზნით".

ამას გარდამ ტელეგრამ-არხი, სუხუმსკი სვეტილნიკ წერს, რომ რუსული მხარე იძულებული გახდა, აფხაზეთის ე.წ. ხელისუფლებისთვის ულტიმატუმი წაეყენებინა ან აღებული ვალდებულებები (ნებაყოფლობით) უნდა შეესრულებინათ, ან მოსკოვი შეწყვეტდა მათ დაფინანსებას. წყაროს ინფორმაციით, 2024 წლის 1 აგვისტოდან რუსეთის ფედერაციამ უკვე შეაჩერა აფხაზეთის სახელმწიფო თანამშრომლებისთვის 170 მილიონი რუბლის ოდენობის ანაზღაურების პროგრამის თანადაფინანსება.

ოკუპირებული აფხაზეთის ე.წ. პარლამენტის თავმჯდომარემ აპარტამენტების შესახებ კანონი უკან გაიწვია. აფხაზეთის ოჩამჩირის, ტყვარჩელისა და გალის რაიონების სოციალურ-ეკონომიკური განვითარების გარკვეული ზომების შესახებ კანონი, უცხო ქვეყნის მოქალაქეებს აღნიშნულ რეგიონებში მიწების შეძენას და აპარტამენტების მშენებლობას ითვალისწინებს.