შენების მოძრაობის თბილისის მერობის კანდიდატი თენგიზ შერგელაშვილი იქნება. ის დღეს, 4 აგვისტოს, მოძრაობის ლიდერმა დავით უსუფაშვილმა დაასახელა.

"საუკეთესო, პროფესიონალი მერობის კანდიდატი თბილისის არჩევნებში. თენგო, რომელმაც ახალგაზრდული ასაკის მიუხედავად, უკვე მოასწრო და მას აქვს 20 წლის სტაჟი მენეჯერული, პოლიტიკური, ანალიტიკური, არის სახელმწიფო მართვის სპეციალისტი, თვითმმართველობების საკითხების სპეციალისტი არამხოლოდ თეორიულად, არამედ პრაქტიკულად. იგი არის თვითმმართველობის იმ რეფორმის ერთ-ერთი შემოქმედი, რომელიც ბოლო ხანებში უკან შეატრიალა არსებულმა ხელისუფლებამ", - ამ სიტყვებით დაახასიათა უსუფაშვილმა შერგელაშვილი.

მისივე თქმით, შენების მოძრაობა გზას გაუხსნის მაღალი დონის პროფესიონალებს და პროფესიონალები გახდებიან პოლიტიკოსები.

"პროფესიონალები სჭირდებიან ხელისუფლებას და ყველა პოსტზე, ყველა სახელმწიფო თანამდებობაზე სწორედ ასეთ პროფესიონალებს წარადგენს [შენების მოძრაობა]", - თქვა უსუფაშვილმა და ხელი შერგელაშილისკენ გაიშვირა.

მერობის კანდიდატმა შენების მოძრაობას მადლობა გადაუხადა იმ როლისთვის, რომელიც წინა ხელისუფლებების მიერ დაგროვილი პრობლემების შეჭიდებაა.