საქართველოს მთავრობამ განკარგულება გამოსცა, რომლის მიხედვითაც ათავისუფლებს საქართველოს ელჩებს შვეიცარიაში, დიდ ბრიტანეთსა და ჩრდილოეთ ირლანდიის გაერთიანებულ სამეფოში, ასევე საქართველოს წარმომადგენლებს ჟენევაში გაერო-ს განყოფილებებსა და სხვა საერთაშორისო ორგანიზაციებში და NATO-ში.
განკარგულების მიხედვით ელჩები პოსტს დატოვებენ;

შვეიცარიაში საქართველოს სრულუფლებიანი ელჩი რამაზ ლომინაძე პოსტს 1 ოქტომბრიდან დატოვებს;

ბრიტანეთში საქართველოს ელჩი სოფიო ქაცარავას 15 ოქტომბრიდან შეუწყდება უფლებამოსილება;

ჟენევაში, გაეროს განყოფილებებისა და სხვა ორგანიზაციებში საქართველოს მუდმივ წარმომადგენელ ალექსანდრე მაისურაძეს პირველი ოქტომბრიდან შეუწყდება უფლებამოსილება;

ვიქტორ დოლიძე, NATO-ში საქართველოს წარმომადგენელი 2024 წლის 21 სექტემბრიდან დატოვებს პოსტს.

ცნობისათვის, რამდენიმე დღის წინ, 20 აგვისტოს, ზურაბ პატარიძის, აზერბაიჯანში საქართველოს ელჩის უფლებამოსილების შეწყვეტაზე გამოსცა მთავრობამ განკარგულება.

მთავრობამ წინადადებით საქართველოს პრეზიდენტს მიმართა და შესაბამისი განკარგულებაც გამოაქვეყნა.

საგარეო საქმეთა სამინისტროში განმარტეს, რომ ელჩების გათავისუფლება მათი როტაციის ვადის ამოწურვას უკავშირდება.