ქუთაისის #2 პენიტენციურ დაწესებულებაში პატიმარმა დაზიანებები მიიღო. პატიმრის ოჯახი ამტკიცებს, რომ მსჯავრდებული ციხეში სასტიკად სცემეს. მათ ამის თქმის საფუძველს კლინიკისგან მიღებული პატიმრის ჯანმრთელობის მდგომარეობა აძლევს — ფაქტს პენიტენციური დაწესებულება უარყოფს.

ოჯახის თქმით, ქუთაისიდან თბილისში გადაყვანის დროს, პატიმრის კლინიკიდან რეანიმობილამდე მიყვანისას, შორიდან დაინახეს პატიმარი და ისეთი დაზიანებები შეამჩნიეს, რასაც პატიმარი, მათი ვარაუდით, დამოუკიდებლად ვერ მიიყენებდა.

"თბილისში, ვივამედში გადაიყვანეს – გადაყვანის პროცესში, შორიდან ვიდექი და იქიდან ვუყურებდი – დავინახე დალურჯებული თვალი, სულ დასივებული და რამდენიმე დაზიანება ჰქონდა, ასევე, ხელებზე. თავის ქალაა ჩამტვრეული […] მეუბნებიან, რომ პატიმარმა თვითონ დაიზიანა თავისი თავი, გადაიჭრა ვენებიო", — ამბობს პატიმრის ოჯახის წევრი TV პირველთან.

სპეციალური პენიტენციური სამსახურის განცხადებით, პატიმარმა თვითდაზიანებები მიიყენა სამართებლის გამოყენებით. მათივე ცნობით, დაწყებულია გამოძიებაც.

"ნ.ბ.-ს დაწესებულებაში ჩაუტარდა პირველადი სამედიცინო დახმარება და გადაყვანილ იქნა სამოქალაქო სექტორის კლინიკაში, სადაც მიეწოდება შესაბამისი სამედიცინო მომსახურება და იმყოფება სამედიცინო პერსონალის მუდმივი მეთვალყურეობის ქვეშ", — ვკითხულობთ უწყების მიერ გავრცელებულ განცხადებაში.

პატიმრის ოჯახის წევრები მოითხოვენ, პენიტენციურმა სამსახურმა გადასცენ მათ სათვალთვალო კამერის ჩანაწერები, რომელიც თვითდაზიანების შესახებ მათ ვერსიას დაადასტურებს.