14 აგვისტოს, გაეროს უშიშროების საბჭოს სხდომაზე განიხილეს რუსეთ-საქართველოს საკითხი და არსებული ვითარება 2008 წლის აგვისტოს ომის 16 წლისთავთან დაკავშირებით.

აშშ-ის, გაერთიანებული სამეფოს, საფრანგეთის, იაპონიის, მალტას, სლოვენიის, დანიისა და საბერძნეთის წარმომადგენლებმა ერთობლივი განცხადებით დაგმეს რუსეთის ქმედებები და საქართველოსადმი მტკიცე მხარდაჭერა გამოხატეს.

აღნიშნულ სხდომაზე, გაერო-ში რუსეთის ფედერაციის მუდმივი წარმომადგენლის მოადგილემ, დიმიტრი პოლიანსკიმ აგვისტოს მოვლენებთან დაკავშირებით, ივანიშვილის პარტიის პოზიცია წაიკითხა.

განცხადებაში, რომელიც 13 აგვისტოს ოცნების პოლიტსაბჭობ გაავრცელა წერია, რომ "2008 წლის რუსეთ-საქართველოს ომის დროს მაშინდელი პრეზიდენტი, მიხეილ სააკაშვილი გარე ძალების დაკვეთის შესაბამისად მოქმედებდა".

ამით, პოლიანსკი შეეცადა რუსეთის ფედერაციის მაშინდელი [2008 წლის] ქმედებების გამართლებას. მან კიდევ ერთხელ გაიმეორა, აგვისტოს ომთან დაკავშირებული კრემლისტური ნარატივი, ამჯერად ქართული ოცნების განცხადების მოშველიებით.

"მე მეტს არ ვისაუბრებ, მე უბრალოდ მოვახდენ საქართველოს მმართველი პარტიის, ქართული ოცნების პოლიტიკური საბჭოს განცხადების ციტირებას: "ქართული საზოგადოების დიდი ნაწილი, სამართლიანად, ეჭვქვეშ აყენებს სააკაშვილის ადეკვატურობას, მაგრამ ფაქტი ისაა, რომ 2008 წლის აგვისტოში, სააკაშვილის ავანტიურისტული ქმედებები, არა მხოლოდ მისი ფსიქიკური არასტაბილურობის, არამედ ასევე გარედან მიღებული ინსტრუქციებისა და კარგად დაგეგმილი ღალატის შედეგია. ჩვენს ქვეყანაში გრძელვადიანი მშვიდობისა და სტაბილურობის დასამყარებლად, სასიცოცხლოდ მნიშვნელოვანია წარიმართოს საჯარო სასამართლო პროცესი, რათა ჩვენმა საზოგადოებამ ერთხელ და სამუდამოდ გაიგოს, ვინ ჩაიდინა ეს მოღალატეობრივი დანაშაული, ჩვენი ქვეყნისა და ჩვენი ხალხის წინააღმდეგ".

უბრალოდ, სცადეთ გაიხსენოთ ეს სიტყვები, როდესაც ჩემი დასავლელი კოლეგები, მოგვიანებით ამ ტრიბუნასთან მოვლენ და მოგატყუებენ იმის შესახებ, თუ რა მოხდა", — თქვა დიმიტრი პოლიანსკიმ გაეროს უშიშროების საბჭოს სხდომაზე