საქართველოს პრეზიდენტმა, სალომე ზურაბიშვილმა "ქართული ოცნების" საპატიო თავმჯდომარე, ბიძინა ივანიშვილი დებატებში გამოიწვია. — ამის შესახებ მან განცხადება, გუშინ ორბელიანების სასახლის ეზოში გამართულ პრესკონფერენციაზე განაცხადა.

"ბიძინა ივანიშვილმა უნდა განუმარტოს საზოგადოებას, რატომ მიიღო ეს ყოვლად არასაჭირო კანონი [აგენტების შესახებ], რატომ შეუცვალა ქვეყანას საგარეო კურსი — მე, მას დებატში ვიწვევ, ნებისმიერ დროს, ნებისმიერ ფორმატში" — განაცხადა სალომე ზურაბიშვილმა.

პრეზიდენტის ამ გამოწვევას უკვე მოჰყვა გამოხმაურება, როგორც "ქართულ ოცნებაში" ისე ოპოზიციაში.

ჯანდაცვის მინისტრმა, მიხეილ სარჯველაძემ — პრეზიდენტის გამოწვევას არასერიოზული უწოდა და თქვა, რომ მას ფაქტობრივად ამის შანსი არ აქვს.

"ინიციატივა ქართული ოცნების საპატიო თავმჯდომარესთან და დამფუძნებელთან დებატის გამართვასთან დაკავშირებით, ცოტა არასერიოზულად გამოიყურება იმიტომ, რომ რეალურად არც შანსი გააჩნია რაიმე დებატის და მგონია, რომ კალიბრის გათვალისწინებით, სერიოზულად აღსაქმელი ეს განცხადება არ უნდა იყოს." — განაცხადა ჯანდაცვის მინისტრმა.

სალომე ზურაბიშვილის გამოწვევას, "ქართული ოცნების" დეპუტატი ბექა ოდიშარიაც გამოეხმაურა და აღნიშნა, რომ ზედაბალი წონის პოლიტიკოსი გავლენიანს ვერ გამოიწვევს.

"ზედაბალი რეიტინგისა და წონის მქონე პოლიტიკოსი ვერასოდეს ვერც გამოიწვევს და არც შედგება ასეთი ტიპის დებატები ისეთ გავლენიან, ავტორიტეტულ პოლიტიკოსთან და საზოგადო მოღვაწესთან, როგორიც ბიძინა ივანიშვილია." — აღნიშნა ოდიშარიამ.

მოგვიანებით, პრეზიდენტის გამოწვევას, საქართველოს პარლამენტის თავმჯდომარე — შალვა პაპუაშვილიც გამოეხმაურა და პრეზიდენტი კონსტიტუციის დარღვევაში კიდევ ერთხელ დაადანაშაულა.

"რასაც აკეთებს სალომე ზურაბიშვილი, ეს არის კვლავ კონსტიტუციის წინააღმდეგ წასვლა - ის ჩართულია პირდაპირ წინასაარჩევნო აგიტაციაში, რაც არის კონსტიტუციის დარღვევა და ეს მისთვის უჩვეულო ნაბიჯი არ არის, ვინაიდან ჩვენ შეჩვეულები ვართ იმას, რომ ის, ზოგადად, უდიერად ეპყრობა საქართველოს კონსტიტუციას. მან გუშინ კვლავ განაცხადა, რომ ის აღიარებს სახელმწიფო ინსტიტუტების ლეგიტიმურობას, სიტყვა სიტყვით ეს თქვა მან და მათ შორის, ისაუბრა სხვადასხვა ინსტიტუტზე. ეს პირდაპირ აჩვენებს, რომ ჩვენ, ფაქტობრივად, ამ პოზიციაზე გვყავს ადამიანი, რომელიც არ აღიარებს ჩვენს სახელმწიფოს." — აცხადებს შალვა პაპუაშვილი.

"რასაკვირველია, სალომე ზურაბიშვილის წინადადების მიღება არ შეიძლება — ეს პოლიტიკურ სივრცეს დააზიანებს!" — ასეთია პარლამენტის პირველი ვიცე-სპიკერის გია ვოლსკის შეფასება პრეზიდენტ სალომე ზურაბიშვილის მიერ დებატებში ბიძინა ივანიშვილის გამოწვევაზე.

"მიზანია, როგორმე რაღაცით ტონი აიმაღლონ, იქნება ბიძინა ივანიშვილი თუ პრემიერ-მინისტრი, შევიდნენ მათთან დებატებში. სალომე ზურაბიშვილი "ქართული ოცნებისა" და ბიძინა ივანიშვილის ძალისხმევით არის პოსტზე, სადაც მან ყველა ვალდებულება დაარღვია" — თქვა ვოლსკიმ.

შეგახსენებთ, სალომე ზურაბიშვილმა გუშინ, ორბელიანების სასახლის ეზოში მედიასთან შეხვედრა გამართა და ჟურნალისტების კითხვებს უპასუხა. პრეზიდენტმა, საზოგადოებას არჩევნებში მაქსიმალურად ჩართვისკენ მოუწოდა.