ქართული ოცნების აღმასრულებელი მდივნის, მამუკა მდინარაძის თქმით, სახელმწიფო უსაფრთხოების სამსახურში უკრაინაში მებრძოლი ქართველებისა და ომის ვეტერანების დაბარებაზე, ტელევიზიები, პოლიტიკოსები, მოწმეები და უფლებადამცველები აქცენტს აკეთებდნენ მხოლოდ შეთქმულების მუხლზე და ტერორიზმის მუხლს არ ახსენებდნენ, რაც მდინარაძის შეფასებით, "ძალიან საეჭვოა".

"ყველა საქმის კურსში იყო, რაში იყო საქმე. თურმე გეგმავდნენ ბიძინა ივანიშვილის და ოცნების სხვა ლიდერების მკვლელობას, აფეთქებას, ტერორისტულ აქტებს და ამის მეშვეობით სახელმწიფო გადატრიალებას. ტერორიზმის მუხლს ცოცხალი თავით არ ახსენებდნენ. რატომ? არ იცოდნენ? დავუშვათ, მისვლის მომენტში არ იცოდნენ, მაგრამ გამოსვლისას ხომ იცოდნენ მარტივად გაიშიფრნენ", — განაცხადა მდინარაძემ.

მისივე თქმით, ტელევიზიები "მხოლოდ შეთქმულებაზე საუბრობდნენ", მესამე დღეს კი, როდესაც გამოჩნდა, რომ ტერორიზმის მუხლიც იყო, მედიამ შემდეგ დაიწყო ამაზე საუბარი:

"ვთქვათ, არ ამხელდნენ ბიძინა ივანიშვილის სახელს და გვარს, დღეს ხელი არ აქვთ მოწერილი გაუთქმელობის ხელწერილზე? გუშინ ჰქონდათ და დღეს არ აქვთ, მოსამართლემ ან გამომძიებელმა მისცა უფლება, ამაზე ილაპარაკეთო? საგულდაგულოდ მალავდნენ და ახლა იძულებული გახდნენ, ამაზე ილაპარაკონ".

ბოლო დღეების განმავლობაში, უკრაინაში მებრძოლ ქართველებისა და ომის ვეტერანების ნაწილს სუსი გამოკითხვაზე იბარებს.

დღეს, 23 ივლისს, სუს-მა ტერორიზმის და შეთქმულების მომზადების საქმეზე, უკრაინაში რუსეთის წინააღმდეგ მებრძოლი გელა კახაბრიშვილი გამოჰკითხა.

კახაბრიშვილის ადვოკატის, მიხეილ რამიშვილის განცხადებით, სუს-ის კითხვები ქართული ოცნების საპატიო თავმჯდომარის, ბიძინა ივანიშვილისა და ოცნების მაღალჩინოსნების მიმართ ტერორისტული აქტის მომზადებას ეხებოდა.

გუშინ, 22 ივლისს, უწყებაში იმყოფებოდა ნადიმ ხმალაძეც. მთავარის ინფორმაციით, სუს-ისგან შეტყობინება გამოკითხვის შესახებ მიიღეს ომის სხვა ვეტერანებმაც — ვაჟა ცეცაძემ, ბესო ბენდელიანმა და ლაშა ჭიღლაძემ.