სოციალური სამართლიანობის ცენტრი (SJC) შრომის ინსპექციის სამსახურს მოუწოდებს, უზრუნველყოს ევოლუშენ ჯორჯიაში ღირსეული სამუშაო გარემო.

SJC-ის მიხედვით, ევოლუშენ ჯორჯიაში დასაქმებულთა შრომითი უფლებების ხშირი დარღვევები და არასათანადო შრომითი პირობები არაერთხელ გამხდარა საზოგადოების ყურადღების საგანი.

"კომპანიაში დასაქმებულთა მძიმე უფლებრივ მდგომარეობას კიდევ ერთხელ ააშკარავებს 2 ივლისს, მაუწყებლის მიერ გავრცელებული ინფორმაცია, კომპანიის მენეჯერების მიმოწერის ამსახველი "სქრინები", სადაც ნათლად ჩანს კომპანიის ხელმძღვანელობის დამამცირებელი და შეურაცხმყოფელი დამოკიდებულება კომპანიაში დასაქმებულ პირთა მიმართ. აღნიშნული ფაქტები შეიცავს შრომით ურთიერთობაში შევიწროების, დისკრიმინაციისა და ღირსების შელახვის ნიშნებს", — აცხადებს SJC.

მათივე თქმით, განსაკუთრებით სამწუხაროა, რომ უფლებები ასე ირღვევა კომპანიაში, სადაც არაერთი ახალგაზრდა და სტუდენტი მუშაობს: "ბევრი მათგანისთვის პირველი სამსახურია ორგანიზაცია, სადაც დასაქმებულების მიმართ ამგვარი დამოკიდებულება, როგორც ჩანს, სისტემური პრობლემაა".

SJC წერს, რომ ევოლუშენ ჯორჯიაში დასაქმებული პირები დიდი ხანია იბრძვიან თავიანთი შრომითი უფლებების დასაცავად. ისინი აპროტესტებენ მიზერულ ხელფასებს, არასათანადო შრომის პირობებს, სამუშაო ადგილზე ანტისანიტარიას და დამსაქმებლის მხრიდან შეურაცხმყოფელ დამოკიდებულებას:

"მათი ინტერესების დამცველი პროფკავშირების, ლაბორისა და ევო-კავშირის ჩართულობით, ახლახან დასრულდა დამსაქმებელთან შრომის კანონმდებლობით გათვალისწინებული მედიაციის პროცესი. მედიაციამ დასაქმებულ პირთათვის სასურველი შედეგი ვერ გამოიღო. შესაბამისად, ისინი გეგმავენ მათი უფლებების დაცვის მიზნით კანონმდებლობით გარანტირებული შემდგომი მექანიზმის, გაფიცვის უფლების გამოყენებას".

ლაბორისა და ევო-კავშირის მიერ გავრცელებული ინფორმაციის თანახმად, მათთვის ცნობილი გახდა ევოლუშენ ჯორჯიას საოპერაციო ხელმძღვანელის მიერ შუალედური რგოლის მენეჯერებისათვის გადაცემული ე.წ. ინსტრუქციის შესახებ, რომელიც გაფიცვის დროს, კომპანიის მხრიდან გასატარებელ სადამსჯელო ღონისძიებებს ასახავს.

"ინფორმაცია შეიცავს გაფიცვის უფლებით სარგებლობის გამო დასაქმებულ პირთა დაშინებისა და გაფიცვის უფლების განხორციელებისათვის ხელშეშლის ნიშნებს", — წერს SJC.

სოციალური სამართლიანობის ცენტრი მოუწოდებს:

• შრომის ინსპექციის სამსახურსა და სახალხო დამცველის ანტი-დისკრიმინაციულ მექანიზმს: შეისწავლონ 2 ივლისს გავრცელებული ინფორმაცია და განახორციელონ შესაბამისი სამართლებრივი რეაგირება;
• შრომის, ჯანმრთელობისა და სოციალური დაცვის სამინისტროსა და შრომის ინსპექციის სამსახურს: სათანადო რეაგირება განახორციელონ გაფიცვის უფლების რეალიზაციის ხელშემშლელ კომპანიის ქმედებებზე, რათა დასაქმებულ პირებს შესაძლებლობა მიეცეთ, თავისუფლად ისარგებლონ საქართველოს კონსტიტუციითა და შრომის კანონმდებლობით გარანტირებული ფუნდამენტური უფლებით.

დღეს, 5 ივლისს, პროფკავშირ ლაბორის თავმჯდომარემ, გიორგი დიასამიძემ, ევოლუშენ ჯორჯიაში დასაქმებულებთან ერთად განაცხადა, რომ თანამშრომლების ნაწილი 12 ივლისს, 12 საათიდან 24-საათიან გაფიცვას იწყებენ.

"ვაპირებთ უვადო სრულმასშტაბიან გაფიცვას მანამ, სანამ ამ ადამიანებს არ ექნებათ ღირსეული შრომითი უფლება და არ იქნება აკრძალული სექსისტური, რასისტული და დისკრიმინაციული როგორც განცხადებები, ასევე მოპყრობა", — თქვა დიასამიძემ.