რა ხდება: ექვსი არასამთავრობო ორგანიზაცია ერთობლივ განცხადებას ავრცელებს და აცხადებს, რომ რუსული კანონის მიღების გამო, ღია მმართველობა საქართველოს (OGP) საბჭოს ტოვებენ.

  • განცხადებას ხელს აწერენ საერთაშორისო გამჭვირვალობა — საქართველო, საქართველოს ახალგაზრდა იურისტთა ასოციაცია, სამოქალაქო საზოგადოების ინსტიტუტი, ინფორმაციის თავისუფლების განვითარების ინსტიტუტი, ეკონომიკური პოლიტიკისა და კვლევის ცენტრი და ფონდი პარტნიორობა საგზაო უსაფრთხოებისთვის.

დეტალები: ორგანიზაციები აცხადებენ, რომ რუსული კანონი პირდაპირ არღვევს ღია მმართველობის პარტნიორობის (OGP) ძირითადი ღირებულებებსა და პრინციპებს, რის გამოც ერთხმად გადაწყვიტეს, დატოვონ როგორც საბჭო, ასევე მისი მუდმივმოქმედი სამუშაო ჯგუფი "ღია მმართველობა საქართველოს ფორუმი".

  • "მივმართავთ საქართველოს მთავრობის ადმინისტრაციას (ღია მმართველობა საქართველოს სამდივნოს), უმოკლეს ვადაში მოამზადოს საქართველოს ღია მმართველობის უწყებათაშორისი საკოორდინაციო საბჭოს დებულებაში შესატანი ცვლილებების პროექტი და დასამტკიცებლად წარუდგინოს საქართველოს მთავრობას", — წერია განცხადებაში.