მოკლედ: ამერიკის შეერთებული შტატების კონგრესში, რუსული კანონის მიღების ფონზე, საქართველოში შექმნილ მდგომარეობაზე მოსმენა გაიმართა.

  • ეს მოსმენა ჰელსინკის კომისიის ფარგლებში შედგა.

დეტალები: მოსმენაში მონაწილეობა მიიღეს სამოქალაქო საზოგადოების ფონდის ევროინტეგრაციის პროგრამის მენეჯერმა ვანო ჩხიკვაძემ, ასევე — საქართველოს ყოფილმა ელჩმა ევროკავშირში, ნატალია საბანაძემ და აშშ-ის ყოფილმა ელჩმა საქართველოში, უილიამ კორტნიმ.

  • ჰელსინკის კომისიის თავმჯდომარემ, რესპუბლიკელმა ჯო ვილსონმა განაცხადა, რომ ამერიკის შეერთებული შტატები ანტიდემოკრატიული ქმედებებს უპასუხოდ არ დატოვებს.
  • მან თქვა, რომ ეს კანონი მთავრობის ანტიდემოკრატიული კურსის აისბერგის წვერად მოჩანს.
  • ვილსონმა, ასევე, თქვა, რომ ოცნება ცესკო-ს ასუსტებს, ძირს უთხრის სასამართლო სისტემას, თავს ესხმის სამოქალაქო საზოგადოებას.

სიტყვით გამოვიდა კონგრესმენი სტივ კოენიც, დემოკრატიული პარტიიდან.

  • მან თქვა, რომ საქართველოში 2012 წელს ჩამოვიდა — მაშინ, როდესაც ქართული ოცნება მოვიდა ხელისუფლებაში. კონგრესმენის თქმით, მიხეილ სააკაშვილი პენიტენციურ სისტემას "დრაკონულად მართავდა" საკუთარი მოქალაქეების დასასჯელად, ივანიშვილი კი კარგი რეფორმატორის შთაბეჭდილებას ტოვებდა, თუმცა, აღნიშნა, რომ ეს "ოცნება აღმოჩნდა". მან ხაზი გაუსვა, რომ საქართველოში მიმდინარე მოვლენები დემოკრატიულ და დასავლურ ღირებულებებს არ შეესაბამება.

ვანო ჩხიკვაძემ კი მოსმენაზე აღნიშნა, რომ მმართველი ძალა ხალხის სურვილის წინააღმდეგ მიდის, რადგან მოსახლეობის სრული უმრავლესობა მომავალს ევროპაში ხედავს.

"ვიაზრებთ, რომ ამ ბრძოლაში მარტო არ ვართ. ვხედავთ და ვაფასებთ, რომ ჩვენი დასავლელი მეგობრები და პარტნიორები ჩვენ გვერდით არიან. სწორედ ამიტომ ვაფასებთ ინიციირებულ კანონს – Megobari Act და გულწრფელად ვიმედოვნებ, რომ ის მალე მიიღება. დრო ახლა ჩვენს წინააღმდეგ იბრძვის და თითოეული წუთი მნიშვნელოვანია", — თქვა ვანო ჩხიკვაძემ.

გაიგეთ მეტი Megobari Act-ზე: კონგრესში შედის კანონპროექტი, რომლის მიხედვით, რუსული კანონის მიღებაზე პასუხისმგებელ პირებს დაეკისრებათ სანქციები