მოკლედ: ევროპის ჩემპიონატზე, საქართველოს ნაკრების მატჩებზე დასასწრებად, მთავრობის მიერ 3 000 სუბსიდირებული ავიაბილეთების გაყიდვა ამ კვირის ბოლომდე დაიწყება.

  • ამის შესახებ საქართველოს პრემიერ-მინისტრმა ირაკლი კობახიძემ დღეს, 20 მაისს, მთავრობის სხდომაზე განაცხადა.

დეტალები: მთლიანობაში, სუბსიდირებული ბილეთების შეძენა 3 000 გულშემატკივარს შეეძლება.

  • დაახლოებით 2 000 გულშემატკივრისთვის უზრუნველყოფილი იქნება პირდაპირი ფრენები თბილისის საერთაშორისო აეროპორტიდან, ხოლო დაახლოებით 1 000 გულშემატკივრისთვის — ქუთაისის საერთაშორისო აეროპორტიდან.
  • ერთი გზის ფასი, სუბსიდირებით იქნება 195 ევრო, შესაბამისად, ორი გზის ფასი იქნება 390 ევრო.

ასევე, ნახეთ — ბუდუ ზივზივაძე: არა რუსეთს! ვდგავარ იმ ახალგაზრდების გვერდით, ვინც თავიანთ ჯანმრთელობას საფრთხის ქვეშ აყენებენ საქართველოს მომავლისთვის

პირდაპირი რეისები უზრუნველყოფილი იქნება გერმანიის ქალაქებში — დორტმუნდში, ჰამბურგში, კიოლნსა და დიუსელდორფში.

  • "ამ ბილეთების შეძენას, შეძლებენ ის მოქალაქეები, რომლებსაც შეძენილი აქვთ საფეხბურთო მატჩის ბილეთები. ავიაბილეთის შეძენისას წარმოდგენილი უნდა იყოს შესაბამისი მატჩის ბილეთი", — განაცხადა პრემიერ-მინისტრმა.

ბოლო ხაზი: საქართველოს ეროვნული საფეხბურთო ნაკრები, ისტორიაში პირველად, ევროპის ჩემპიონატზეა მას შემდეგ, რაც 2024 წლის 26 მარტს ჩემპიონატის შესარჩევი ეტაპის საპლეიოფო ფინალში, საბერძნეთს მოუგო.

  • საქართველოს ეროვნული ნაკრები ევროპის ჩემპიონატზე პირველ თამაშს 18 ივნისს, დორტმუნდში გამართავს, სადაც თურქეთის ნაკრებს დაუპირისპირდება.