მოკლედ: საქართველოს ახალგაზრდა იურისტთა ასოციაცია აცხადებს, რომ 15 აპრილიდან 9 მაისის ჩათვლით, არასამთავრობო ორგანიზაციების ერთიან ცხელ ხაზზე, 134 დაკავებული პირის შესახებ შემოვიდა შეტყობინება.

• ყველა მათგანი ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციელის კანონიერი მოთხოვნისადმი დაუმორჩილებლობა) მუხლების საფუძველზე დააკავეს.

დეტალები: საიას მიხედვით, დაკავებულების იზოლატორებში ძებნის და მათთან გასაუბრების დროს, რამდენიმე პრობლემა გამოიკვეთა.

• დაკავებულების ადგილსამყოფლის შესახებ ინფორმაციის დროულად მიღების პრობლემა: მიუხედავად იმისა, რომ მოქალაქეს დაკავებისთანავე აქვს უფლება, საკუთარი ადგილსამყოფლის შესახებ აცნობოს ოჯახს/ადვოკატს, დაკავებულების უმეტესობას ამის შესაძლებლობა არ ჰქონდა:
• "ადვოკატებს მთელი ღამის განმავლობაში უწევდათ დაკავებულების ძებნა. ხშირად, მათი ადგილსამყოფლის დადგენა მხოლოდ სხვადასხვა იზოლატორებში, მათ შორის, თბილისის გარეთ (თელავი, მცხეთა, დუშეთი, გორი, ხაშური) არსებულ იზოლატორებში, ადგილზე ვიზიტის შემდეგ ხერხდებოდა".
• დაკავების ვადის დაუსაბუთებელი გახანგრძლივება: საია წერს, რომ ადმინისტრაციული დაკავება უმეტესად მაქსიმალური, 48 საათის ვადით, შაბლონური დასაბუთების საფუძველზე გაგრძელდა.
• დაკავების გახანგრძლივება საჭირო იყო დამატებითი მტკიცებულებების მოსაპოვებლად, თუმცა, სასამართლოში საქმის განხილვის ფარგლებში იკვეთებოდა, რომ ამ პერიოდში, არანაირი დამატებითი მტკიცებულებების მოპოვება არ ხდებოდა:
• "უფრო მეტიც, უმეტესად 48-საათიანი დაკავების შემდეგ სამართალდამცავმა უწყებამ დაკავებულები სასამართლოში არც კი მიიყვანა. ამ დრომდე საქმეთა უმეტესობა სასამართლოში არაა წარდგენილი".
• დაკავებისას სამართალდამცავების მხრიდან ძალის გადამეტება: მოქალაქეები, დაკავების დროს, სამართალდამცავების მხრიდან ფიზიკური და სიტყვიერი შეურაცხყოფის ფაქტებზე მიუთითებენ.
• რამდენიმე მათგანს, დაზიანების სიმძიმიდან გამომდინარე, სამედიცინო დაწესებულებაში მოუწია მკურნალობა. დაკავებულთა უმეტესობას აღენიშნებოდა სხეულის სხვადასხვა ხარისხის დაზიანებები, რომლებიც, მათივე განმარტებით, სამართალდამცავებმა მიაყენეს დაკავების დროს.
• საია წერს, რომ სამსახურებრივი უფლებამოსილების ძალადობით შესაძლო გადამეტების ფაქტებზე, ინფორმაცია მიეწოდა სპეციალურ საგამოძიებო სამსახურსაც.
• არასამთავრობო ორგანიზაციათა ქსელი, ამ ეტაპზე 30-მდე დაზარალებულს იცავს.
• საქმეების განხილვა სასამართლოში: საიას ინფორმაციით, პირველი ინსტანციის სასამართლოში დასრულდა 12 საქმის განხილვა. სასამართლომ ყველა პირი მიიჩნია ადმინისტრაციულ სამართალდამრღვევად და მათ მიმართ გამოიყენა საკმაოდ მკაცრი სანქციები, კერძოდ
• ერთ პირს შეეფარდა ადმინისტრაციული პატიმრობა (5 დღის ვადით), ხოლო სხვა პირებს 2000 ლარიდან 2600 ლარამდე ოდენობის ჯარიმები შეეფარდათ.
• მხოლოდ ერთ პირს მიეცა სიტყვიერი შენიშვნა. ჯარიმების საერთო რაოდენობა ამ დროისათვის შეადგენს - 20 700 ლარს.

საქართველოს ახალგაზრდა იურისტთა ასოციაციის შეფასებით, მოსამართლეები, ძირითადად, ყოველგვარი ობიექტური მტკიცებულების გარეშე, იღებდნენ მშვიდობიანი აქციის მონაწილეების სამართალდამრღვევად ცნობის გადაწყვეტილებებს.

ბოლო ხაზი: სამართლებრივი დახმარების ქსელის წევრი ორგანიზაციები არიან:

• საქართველოს ახალგაზრდა იურისტთა ასოციაცია (GYLA), საერთაშორისო გამჭვირვალობა - საქართველო (TI), სოციალური სამართლიანობის ცენტრი (SJC),
• საქართველოს დემოკრატიული ინიციატივა (GDI), უფლებები საქართველო (RG), სამართლიანი არჩევნებისა და დემოკრატიის საერთაშორისო საზოგადოება (ISFED),
• ადამიანის უფლებათა ცენტრი (HRC), დემოკრატიის კვლევის ინსტიტუტი (DRI), ქალთა ინიციატივების მხარდამჭერი ჯგუფი (WISG), პარტნიორობა ადამიანის უფლებებისთვის (PHR), სამოქალაქო საზოგადოების ფონდი (CSF).