რა ხდება: პარლამენტმა ცენტრალური საარჩევნო კომისიის თავმჯდომარის თანამდებობაზე გიორგი კალანდარიშვილი აირჩია. მის კანდიდატურას მხარი დაუჭირა 85-მა დეპუტატმა, წინააღმდეგი იყო — 16.

დეტალები: პარლამენტმა ასევე აირჩია ცენტრალური საარჩევნო კომისიის 3 წევრი — მაია ზარიძე, გიორგი შარაბიძე და გია ცაცაშვილი.

  • ცენტრალური საარჩევნო კომისიის თავმჯდომარე და კომისიის წევრები 5 წლის ვადით იქნებიან არჩეული.

კონტექსტი: გიორგი კალანდარიშვილის კანდიდატურას, ქართული ოცნების გარდა, გირჩმაც დაუჭირა მხარი. ეს ამ ორი პარტიის წინასწარი შეთანხმების შედეგია.

  • კალანდარიშვილის კანდიდატურისთვის მხარდაჭერის სანაცვლოდ, გირჩმა მიიღო საპარლამენტო უმრავლესობის მხარდაჭერა გენდერული კვოტის გაუქმების შესახებ.
  • 2024 წლის 1-ელ აპრილს, ოცნების დეპუტატმა ბექა დავითულიანმა განაცხადა, რომ კვოტების გაუქმების სანაცვლოდ, ქართულმა ოცნებამ გირჩისგან მიიღო დაპირება, რომ ცესკოს თავმჯდომარის არჩევის პროცესში, გირჩი ორიენტირებული იქნება კანდიდატის "პროფესიონალიზმსა და კეთილსინდისიერებაზე".
  • 2 აპრილს, გირჩის წევრმა ალექსანდრე რაქვიაშვილმა თქვა, რომ გირჩსა და ქართულ ოცნებას შორის შეთანხმება "პოლიტიკური ვაჭრობის" კარგი მაგალითია.