მოკლედ: საქართველოს მესამე პრეზიდენტი მიხეილ სააკაშვილი ერთიან ნაციონალურ მოძრაობას სთხოვს შექმნას პარტიის ბორდი და თავმჯდომარედ მისი, ხოლო თავმჯდომარის მოადგილედ სოფო ჯაფარიძის კანდიდატურა განხილონ:

  • "მიუხედავად იმისა, რომ რეჟიმს ახლაც იზოლირებული ვყავარ და ჩემ მიმართ ახალ რეპრესიებს ამზადებს, მე მზად ვარ, კიდევ უფრო აქტიურად ჩავერთო და ყველა ხელოვნური დაბრკოლება გადავლახო".

დეტალები: სააკაშვილი აღნიშნავს, რომ წინასაარჩევნოდ ოპოზიციური პარტიების ერთიანობა მნიშვნელოვანია, რაც, მისი თქმით, პირველ რიგში, არჩევნებზე საერთო სიას ნიშნავს:

  • "დათვლებით, საერთო სიის შემთხვევაში, ოპოზიცია ოცნებას 70/30 პროპორციით დაამარცხებს. შემდეგ გარდამავალი მთავრობა უნდა ჩამოყალიბდეს და ძლიერი სპეციალისტებით დაკომპლექტდეს".
  • სააკაშვილი წერს, რომ ოპოზიცია და სამოქალაქო საზოგადოება სასამართლოში ცვლილებებზე, დეოლიგარქიზაციის პრინციპებსა და მომავალ კონსენსუსურ საპრეზიდენტო კანდიდატზე ახლავე უნდა შეთანხმდნენ.

სააკაშვილი მიიჩნევს, რომ საერთო ოპოზიციურ სიაში პირველ ნომრად სოფო ჯაფარიძე უნდა იყოს, რადგან ის "განსაკუთრებით წარმოჩინდა, როგორც წამყვანი და გამწევი ძალა ახალი გენერაციის პოლიტიკოსებში".

  • "მე მას [სოფო ჯაფარიძეს] სრულად ვენდობი, რაც მის საქმიანობაზე მრავალწლიან დაკვირვებასა და ბოლო წლის განმავლობაში ჩვენ მჭიდრო თანამშრომლობას ეფუძნება", — წერს სააკაშვილი.