მოკლედ: პარლამენტის მიერ საგადასახადო კოდექსში ცვლილებების დაჩქარებული წესით მიღებას ოპოზიცია ივანიშვილის შესაძლო სანქცირებას უკავშირებს.

დეტალები: რომან გოცირიძის თქმით, ეს არის კანონი "ბიძინა ივანიშვილის ოფშორში განთავსებული აქტივების, აქციების, წილების, ქონების საქართველოში დაუბეგრავად გადმოტანის შესახებ".

  • "ასევე, ამით ისარგებლებს უამრავი ის პირი, რომელიც არ არის საქართველოს მოქალაქე, მათ საქართველოში ფულის გათეთრების შანსი გაუჩნდებათ",— თქვა გოცირიძემ.

ლელოს დეპუტატი, სალომე სამადაშვილი ასევე მიიჩნევს, რომ პარლამენტმა დაჩქარებული წესით მიღებული კანონი, "ივანიშვილის ჭუჭყიანი რუსული ფულის კანონია".

ახლადდაფუძნებული პარტია ახალის ერთ-ერთი ლიდერი, ნიკა გვარამია კი ამბობს, რომ ამ კანონით ჩვენს დასავლურ კურსს სერიოზული საფრთხე შეექმნება:

  • "დღეს მიღებული ოფშორების კანონი, რუსულ კანონთან კომბინაციაში, პირდაპირი გზაა ცივილიზაციურ ჯოჯოხეთში. ევროკავშირს კი არა, ყველანაირ დასავლეთს დაგვავიწყებენ. არც ვიზალიბერალიზაცია შეგვრჩება, გამორიცხულია", — წერს ნიკა გვარამია ფეისბუქზე.

ბოლო ხაზი: პარლამენტმა საგადასახადო კოდექსში ცვლილების შეტანას, რომელიც ოფშორიდან აქტივების გადმომტანის დაბეგვრისგან გათავისუფლებასაც ითვალისწინებს, მხარი მესამე მოსმენით დღეს დაუჭირა.