რა თქვა პრეზიდენტმა: "პროვოკაციის და დაძაბვის დრო არაა! ხალხმა სიმშვიდისა და შემართების მაგალითი ყველას მოგვცა! დღეს არ მთავრდება ეს პროტესტი!", — ამის შესახებ საქართველოს პრეზიდენტმა, სალომე ზურაბიშვილმა სოციალურ ქსელში დაწერა.

რა ვითარებაა ახლა კანცელარიასთან: მთავრობის ადმინისტრაციასთან აქციის მონაწილეებსა და პოლიციელებს შორის დაპირისპირებაა.

  • ადგილზე დაიწყეს დამატებითი საპოლიციო ძალების მობილიზება, იმის მიუხედავად, რომ კანცელარიის მიმდებარედ, მთელი საღამოს განმავლობაში, დიდი რაოდენობით სამართალდამცველები იმყოფებოდნენ.
  • პოლიციამ განარიდა ადგილიდან ოპოზიციონერი დეპუტატები — ალეკო ელისაშვილი და ლევან ხაბეიშვილი.
  • შსს აცხადებს, რომ ორი პირი დააკავა.
  • ტვ პირველმა განაცხადა, რომ დაშავებულია მათი ოპერატორი და ასევე, აქციის ზოგი მონაწილე.

რას ითხოვს ხალხი: აქციის მონაწილეების მიზანია, შევიდნენ კანცელარიაში ირაკლი კობახიძესთან შესახევედრად.

  • იქ იმყოფება ოპოზიციონერი პოლიტიკოსი ზურაბ ჯაფარიძეც, რომელიც სთავაზობს პრემიერ-მინისტრს, მასთან საუბრის საშუალება მისცეს იქ შეკრებილებს.
  • "თუ ყველას არა, მე ამოვალ, ან ვინმე სხვა, ჩავრთოთ ფეისბუქლაივი და ვილაპარაკოთ, რატომ არის ეს კანონი რუსული", — თქვა მან.

ბოლო ხაზი: რუსული კანონის გასაპროტესტებლად შეკრებილი მოქალაქეები კანცელარიასთან ავიდნენ იმ მიზნით, რომ ირაკლი კობახიძესთან შეხვედრა მოეთხოვათ. ამას წინ უძღოდა პარლამენტთან მიმდინარე საპროტესტო აქციისას ხელისუფლებისთვის მიცემული 1-საათიანი ვადა, რუსული კანონის უკან გასაწვევად.