რა ხდება: "ღირსეული შრომის პლატფორმა“, გმობს მთავრობის მიერ უცხოური გავლენის შესახებ კანონპროექტის ხელახლა ინიციირებას, რომელიც საერთაშორისო დაფინანსების შემთხვევაში ქართულ სამოქალაქო საზოგადოების ორგანიზაციებს და მედიებს "უცხოური ძალის ინტერესების გამტარებელ ორგანიზაციად" რეგისტრაციას ავალდებულებს.

დეტალები: განცხადებაში, რომელსაც ხელს აწერენ სოციალური სამართლიანობის ცენტრი,
სამოქალაქო საზოგადოების ფონდი, გილდია, საქართველოს ახალგაზრდა იურისტთა ასოციაცია და მეცნიერების, განათლების და კულტურის პროფკავშირი, ნათქვამია, რომ:

• ეს არის მცდელობა, ხელისუფლებამ გააკონტროლოს და იარლიყო მიაკრას დამოუკიდებელ სამოქალაქო საზოგადოების ორგანიზაციებს და მედიას.

ამას გარდა, მათი თქმით, კანონპროექტი სერიოზულ ზიანს აყენებს მშრომელთა უფლებებსაც; საქართველოს კანონმდებლობით, პროფესიული კავშირები არასამთავრობო ორგანიზაციებად ითვლება და ამდენად, 20%-ზე მეტი საერთაშორისო დაფინანსების შემთხვევაში, ეს კანონი მათზეც გავრცელდება.

• "მიზანი არის არა გამჭვირვალობა, არამედ საბაზისო უფლებებზე თავდასხმა და იმ კრიტიკული ორგანიზაციების გაჩუმება, რომლებიც უფლებადარღვევების და უსამართლობის წინააღმდეგ იმაღლებს ხმას.
• მთავრობის მიზნებს შორისაა დამოუკიდებელი პროფესიული კავშირების დასუსტებასაც, რომლებიც აქტიურად მუშაობენ საქართველოში შრომის უკიდურესად დაბალ ანაზღაურებაზე, შრომის უსაფრთხოების ჩავარდნებზე, პროფესიული გაერთიანებების დასუსტებაზე და სხვა შრომით საკითხებზე. პროფკავშირები ეხმარება დასაქმებულებს, ებრძოლონ უსამართლო შრომით პრაქტიკებს, მოახდინონ სამუშაო ადგილის დემოკრატიზება, და ცდილობს, გააძლიეროს მშრომელების ხმა გარემოში, რომელშიც დიდი კაპიტალის და სახელმწიფოს ძალაუფლება დომინირებს. ინიციირებული კანონპროექტი კი მშრომელების პოზიციას კიდევ უფრო დაასუსტებს", — ნათქვამია განცხადებაში.

ასევე, აღნიშნულია, რომ პროფესიული კავშირები დაფინანსებას საწევრო გადასახადებით იღებენ, თუმცა მათი ნაწილი ასევე იღებს საერთაშორისო დაფინანსებას კვლევის, სამართლებრივი დახმარების თუ კონფერენციების ხარჯების დასაფარად.

• ეს დაფინანსება კი, რომელიც სხვა წყაროებიდან არ არის ხელმისაწვდომი, გამოიყენება მშრომელების ინტერესების დასაცავად, ხოლო დამოუკიდებელი პროფკავშირები ანგარიშვალდებულები რჩებიან საკუთარი წევრების წინაშე.

განცხადების ავტორების თქმით, კანონპროექტი, ასევე, მიზანში იღებს სამოქალაქო საზოგადოების ორგანიზაციებს, როლებიც მშრომელებს იურიდიულ დახმარებას აწვდიან და ეხმარებიან მათ საკუთარი შრომითი უფლებებისთვის ბრძოლაში:

• "სამართლებრივი მომსახურების მაღალი საფასურის გამო, ამგვარი უფასო იურიდიული დახმარება, ბევრისთვის ერთადერთი შესაძლებლობაა. საერთაშორისო დონორები, რომლებიც ასეთ იურიდიულ დახმარებას აფინანსებენ, ავსებენ იმ ხარვეზს, რომლის მოგვარებაც, როგორც მთავრობამ, ისე ადგილობრივმა დონორებმა ვერ შეძლეს, ან არ სურთ."

განცხადების მიხედვით, კანონპროექტი, დამტკიცების შემთხვევაში, გაანადგურებს მცირე, დამოუკიდებელ მედიასაშუალებებს, რომლებსაც ეყრდნობიან მშრომელები, შრომითი უფლებების დარღვევების შესახებ ცნობიერების ასამაღლებლად.ამის შედეგად კი მშრომელების პრობლემები კიდევ უფრო უჩინარი გახდება.

ავტორები, ასევე, აცხადებენ, რომ კანონპროექტის შედეგად დგება კითხვის ნიშნები ევროკავშირში საქართველოს გაწევრიანებასთან დაკავშირებით. ეს კი პრობლემურია შრომითი უფლებების თვალსაზრისით, რადგან ევროკავშირის კანონმდებლობა, შრომითი უფლებების დაცვის კუთხით, საქართველოს კანონმდებლობაზე გაცილებით ძლიერია ყველა ასპექტში, მათ შორის, მინიმალური ხელფასის, ზეგანაკვეთური შრომისა და სოციალური უსაფრთხოების მიმართულებებით.

• "ევროკავშირში გაწევრიანებამდე, საქართველო ვალდებული იქნება, შეიმუშაოს მსგავსი დამცავი მექანიზმები რაც იმას ნიშნავს, რომ ევროინტეგრაციის პროცესი გააუმჯობესებს ქვეყანაში არსებული შრომითი უფლებების მდგომარეობას. ნებისმიერი მოქმედება, რომელიც საფრთხეს უქმნის ამ პროცესს, იქნება საზიანო მშრომელებისათვის", — წერენ ორგანიზაციები და მოუწოდებენ საქართველოს მთავრობას, საბოლოოდ თქვას უარი ამ კანონპროექტის, ან სხვა მსგავსი კანონმდებლობის მიღების მცდელობებზე.