მოკლედ: თბილისის საქალაქო სასამართლომ უკანონოდ მიიჩნია საქართველოს ეროვნული მუზეუმიდან თემურ შარიქაძის გათავისუფლება და ეროვნულ მუზეუმს განაცდურის ანაზღაურება და 3000-ლარიანი კომპენსაცია დააკისრა.

  • ამის შესახებ ინფორმაცია მეცნიერების, განათლების და კულტურის პროფკავშირმა გუშინ, 5 მარტს გაავრცელა.

დეტალები: "პროფკავშირმა მორიგი სასამართლო პროცესი მოუგო საქართველოს ეროვნული მუზეუმის ახალ ხელმძღვანელობას, საქართველოს კულტურისა და სპორტის სამინისტროს და პირადად თეა წულუკიანს", — წერს კულტურის პროფკავშირი.

  • მათი თქმით, სასამართლო, "საქართველოს ეროვნულ მუზეუმში ჩატარებული მავნებლური რეორგანიზაციის შემდეგ", ეროვნულ მუზეუმს ვერ დაავალდებულებს დასაქმებული აღადგინოს დაკავებულ თანამდებობაზე.
  • კულტურის პროფკავშირი წერს, რომ თემურ შარიქაძის სასამართლო მე-16 სასამართლო პროცესია, რომელიც "კულტურის სამინისტროს სისტემიდან უკანონოდ და რეპრესიულად გათავისუფლებულმა ადამიანებმა მოიგეს კულტურის, სპორტისა და ახალგაზრდობის სამინისტროს წინააღმდეგ".

ბოლო ხაზი: თემურ შარიქაძე საქართველოს ეროვნული მუზეუმიდან 2022 წლის მაისში 21 სხვა თანამშრომელთან ერთად გაათავისუფლეს. ბრძანებებს ხელი დირექტორის მოადგილემ, ნიკა ახალბედაშვილმა მოაწერა, რომელიც თეა წულუკიანის მიერ არის დასაქმებული.

  • თემურ შარიქაძე 2014 წლიდან რეგიონული მუზეუმების კოლექციების აღრიცხვა-დაცვის მართვის სექტორს ხელმძღვანელობდა და მუშაობის 44-წლიანი გამოცდილება აქვს.