მოკლედ: საქართველოს პრემიერ-მინისტრი, ირაკლი კობახიძე აცხადებს, რომ ამ დრომდე არ შეურჩევია ჯანდაცვის ახალი მინისტრი.

  • "არც პირადად, არც ირიბად, არცერთი ადამიანისთვის მინისტრობა არ შემითავაზებია, არცერთი პრეცედენტი არ ყოფილა ამის", — თქვან მან ჟურნალისტებთან საუბრისას.
  • ირაკლი ღარიბაშვილის მინისტრთა კაბინეტის ჯანდაცვის მინისტრმა, ზურაბ აზარაშვილმა თანამდებობა 1-ელ მარტს დატოვა. მინისტრის პოსტიდან წასვლის შემდეგ კი საქართველოში "საეჭვო" ონკოლოგიური პრეპარატების შემოტანის შესახებ ფეისბუქზე სტატუსი გამოაქვეყნა.

სხვა დეტალები: ჯანდაცვის მინისტრის ცვლილების გარდა, პრემიერ-მინისტრის პოსტზე ღარიბაშვილის კობახიძით ჩანაცვლებას რამდენიმე საკადრო ცვლილება მოჰყვა, მათ შორის, მთავრობის ადმინისტრაციაში. კობახიძემ 1-ელ მარტს ხელი მოაწერა განკარგულებას მთავრობის ადმინისტრაციის ხელმძღვანელის გათავისუფლების შესახებ.

ირაკლი კობახიძე: "რამდენიმე გადაწყვეტილებაა მისაღები, მათ შორის, ეს ეხება ჯანდაცვის მინისტრს, ადმინისტრაციის ხელმძღვანელს, ასევე, კონკრეტული დეპარტამენტის ხელმძღვანელს.

  • რაც შეეხება ახალ კადრებს, ამასთან დაკავშირებით კვირის ბოლომდე გავაკეთებ განცხადებას.
  • თითოეული ვაკანსია შეივსება კვირის ბოლომდე.
  • ჯერჯერობით გვაქვს შიდა სამუშაო პროცესი, ვარჩევთ კანდიდატებს და როგორც კი ჩამოვყალიბდებით გარკვეულ პოზიციაზე, ამის შემდეგ, დავიწყებთ შეთავაზებას", — თქვა მან.

ბოლო ხაზი: პრემიერ-მინისტრის ცვლილების შემდეგ, უწყებებს, მეტწილად, ირაკლი ღარიბაშვილთან დაკავშირებული პირები ტოვებენ.