რა ხდება: ორგანიზაცია საერთაშორისო-გამჭვირვალობა საქართველო (TI), ოფიციალურ დოკუმენტებზე დაყრდნობით, აცხადებს, რომ სენაკის მუნიციპალიტეტის ბიუჯეტიდან დაიხარჯება თითქმის 90 000 ლარი კლიპის გადასაღებად, რომელშიც მეტწილად, ტელეარხ იმედის თანამშრომლები მიიღებენ მონაწილეობას ღამის შოუს ბენდიდან.

  • იმედი არის სამთავრობო ტელევიზია, რომელიც საინფორმაციო გამოშვებებსა და პოლიტიკურ, თუ ანალიტიკურ გადაცემებში ქართული ოცნების ხელისუფლების გზავნილებს იმეორებს;
  • არხი, პოლიტიკური ველიდან პირდაპირ ეთერში არ იწვევს არავის, ხელისუფლების წარმომადგენლების გარდა.

დეტალები: TI-ის თანახმად, სენაკზე მუსიკალური კლიპის გადასაღებად მუნიციპალიტეტის ბიუჯეტიდან 89 680 ლარი დაიხარჯება.

  • მუნიციპალიტეტმა კლიპის გადაღების მომსახურება 2023 წლის 25 დეკემბერს გამარტივებული წესით, შპს 20 Steps Production-ისგან შეისყიდა, რომლის 100 %-იანი წილის მფლობელი და დირექტორი ვლადიმერ კაჭარავაა.
  • ეს კომპანია მხოლოდ გამარტივებულ შესყიდვებს იღებს.
  • დღემდე მიღებული აქვს 923 872 ლარის ჯამური ღირებულების 7 გამარტივებული შესყიდვა.
  • აქედან, 710 640 ლარის ღირებულების 4 ხელშეკრულება თავდაცვის სამინისტროსთან 2020-2022 წლებში გააფორმა.

რა არის პრობლემა: საერთაშორისო გამჭვირვალობა - საქართველოს მიაჩნია, რომ მომსახურების გამარტივებული წესით შესყიდვა კონკურენციის არსებობას გამორიცხავს და კორუფციულ რისკებს ზრდის.

  • "მოვუწოდებთ შესაბამის ორგანოებს, გამოიძიონ ამ გამარტივებული შესყიდვის მიზანშეწონილობა;
  • ასევე მოვუწოდებთ სახელმწიფო შესყიდვების სააგენტოს, უფრო მკაცრად მოეკიდოს პირდაპირი შესყიდვებისთვის თანხმობის გაცემის საკითხს", — აცხადებს TI.