დღეს, უკრაინის პრეზიდენტის, პეტრო პოროშენკოს ოფიციალური ვიზიტისას, საქართველო-უკრაინის ბიზნეს-ფორუმზე, მთავარ ბანერზე უკრაინულ ენაზე ქვეყნის დასახელება - უკრაინა - შეცდომით ეწერა.

ფორუმს უკრაინის პრეზიდენტ პეტრო პოროშენკოსთან ერთად, პრემიერი გიორგი კვირიკაშვილი ესწრებოდა. ღონისძიებაზე იმყოფებოდა 120-მდე ქართული და 34 უკრაინული კომპანიის წარმომადგენელი. ფორუმზე საქართველოსა და უკრაინის საინვესტიციო გარემო, ტურისტული პოტენციალი და საპარტნიორო ფონდის პროექტები განიხილეს.

მთავრობის ადმინისტრაციაში On.ge-ის განუცხადეს, რომ ბიზნეს ფორუმის ორგანიზატორი იყო სავაჭრო-სამრეწველო პალატა, შესაბამისად, აღნიშნული უწყება იყო პასუხისმგებელი ბანერის დამზადებაზე.

უკრაინის პრეზიდენტი საქართველოს გუშინ, 17 ივლისს ეწვია. ის თბილისში ოჯახთან, სახელმწიფო დელეგაციის წევრებთან და უკრაინელ ბიზნესმენებთან ერთად ჩამოვიდა.

განახლება: სავაჭრო-სამრეწველო პალატა ბიზნეს-ფორუმის მთავარ ბანერზე შეცდომისთვის ბოდიშს იხდის