გორის მუნიციპალიტეტის სოფელ იფნარის ტყეში დატყვევებული დათვი თბილისის ახალ ზოოპარკშია გადაყვანილი. ამის შესახებ ინფორმაციას ზოოპარკი ფეისბუქგვერდზე ავრცელებს.

"ღამით გორის პოლიციიდან დაგვიკავშირდნენ და დათვის გადმოყვანასთან დაკავშირებით დახმარება გვთხოვეს", — ვკითხულობთ ზოოპარკის განცხადებაში, — "ჩვენი ვეტექიმი მათთან ერთად გაემგზავრა გორის რაიონის სოფელ იფნარის მიმდებარე ტყეში, დათვი დააძინა და ამჟამად ცხოველი უკვე ჩვენთანაა, ახალი ზოოპარკის საკარანტინე სივრცეში".

დაწესებულების ცნობით, ცხოველი დასტრესილი და შეშინებულია, ამასთან, აქვს დაზიანება კისრის არეში. ზოოპარკში დათვი ახლა მეთვალყურეობის ქვეშაა და მას მკურნალობენ.

"დათვის მკურნალობას ზოოპარკში გავაგრძელებთ მის სრულ გამოჯანმრთელებამდე და რეაბილიტაციის შემდეგ, ვიმოქმედებთ ცხოველის საუკეთესო ინტერესებიდან გამომდინარე", — ამატებს ზოოპარკი.

თითქმის სრულად დაცარიელებული სოფლის მახლობლად ჯაჭვით დაბმული დათვის ამბავი სოციალურ ქსელში 10 თებერვალს გავრცელდა. ცხოველთა უფლებადამცველი თამუნა გოგალაძე წერდა, რომ დათვი ჯერ კიდევ მაშინ დააბეს, როცა ის ბელი იყო, უკვე გაზრდილ ცხოველს კი მარყუჟმა ყელ-კისერი დაუზიანა.

გოგალაძემ დახმარებისთვის შინაგან საქმეთა სამინისტროსა და პარლამენტის გარემოს დაცვისა და ბუნებრივი რესურსების კომიტეტს, ასევე მედიებს მიმართა. სწორედ მედიაში ინფორმაციის გავრცელების შემდეგ, 11 თებერვალს დაიწყო საქმეზე გამოძიება.

შიდა ქართლის საინფორმაციო ცენტრის ცნობით, ცხოველისადმი სასტიკი მოპყრობის ფაქტზე შსს-მ გამოძიება სისხლის სამართლის კოდექსის 259-ე მუხლით დაიწყო.