ქართული ოცნების თბილისის მერობის კანდიდატი და ენერგეტიკის ყოფილი მინისტრი, კახა კალაძე, ფეისბუკზე წერს, რომ საქართველოში პოლიტიკურ ნიადაგზე აგრესიული დაპირისპირება და ადამიანების შეურაცხყოფა უნდა დასრულდეს:

"წარმოუდგენელია აცხადებდე, რომ იცავ ყველაფერ იმას, რაც ღირებულია ჩვენი ქვეყნისთვის- სტუმართმოყვარეობა, ტოლერანტობა, ქალისადმი პატივისცემა და ვაჟკაცობა, და რეალურად, საქციელით ამას ყველაფერს ზურგით უდგებოდე. საზოგადოება, პოლიტიკური კულტურა ვერ განვითარდება ასეთი სტილის ოპონირების პირობებში".

ამ განცხადებით, კახა კალაძე, სავარაუდოდ, თათია დოლიძის მიმართ ქსენოფობიური ქართული მარშის ორგანიზატორების მხრიდან გაუპატიურების მუქარას გამოეხმაურა, რომელზეც შსს-მ გამოძიება 151-ე მუხლით დაიწყო.

"მოვუწოდებ ყველა საჯარო პირს, პოლიტიკურად აქტიურ მოქალაქეებს - იმოქმედეთ, ისაუბრეთ და დაუპირისპირდით ოპონენტებს მორალის, ადამიანობის და პოლიტიკური კულტურის ფარგლებში" - აცხადებს თბილისის მერობის კანდიდატი.