მოკლედ: თბილისის მერიის დაქვემდებარებაში არსებული თბილსერვის ჯგუფი სახელმწიფო შესყიდვას აცხადებს ცოცხებზე, რომელიც განკუთვნილი იქნება გარე გამოყენებისთვის — ეზოსთვის ან ქუჩისთვის.

  • სატენდერო პირობაში დაკონკრეტებულია, რომ სატენდერო წინადადება ე.წ. "მინდვრის ცოცხს" გულისხმობს.
  • ამისთვის თბილსერვის ჯგუფმა ელექტრონული ტენდერი აუქციონის გარეშე გამოაცხადა 2024 წლის 26 იანვარს.
  • სატენდერო დოკუმენტაციის მიხედვით, ტენდერი 50 000 ერთეული "მინდვრის ცოცხის" შესაძენად გამოცხადდა.
  • შესყიდვის სავარაუდო ღირებულება, მთლიანობაში, 43 000 ლარი იქნება.
  • წინადადებების მიღება 7 თებერვალს დასრულდება, თუმცა, სახელმწიფო შესყიდვების სააგენტოს პორტალის მიხედვით, თბილსერვისს შეთავაზებები ჯერ არ მიუღია.

დეტალები: დოკუმენტაციაში აღნიშნულია ტექნიკური მახასიათებლები, რომლის თანახმად, მინდვრის ცოცხი უნდა იყოს "გამომშრალი, ერთი შეკვრა (კონა) უნდა შედგებოდეს 50-60 ღეროსგან, თითოეულ ღეროს უნდა ქონდეს არანაკლებ 5 განშტოება. სიგრძე — არანაკლებ 50 სმ."

ბოლო ხაზი: სატენდერო წინადადების მიხედვით, გამარჯვებულმა კომპანიამ პირველ ეტაპზე, არანაკლებ 25 000 ერთეული ცოცხის მიწოდება უნდა შეძლოს ხელშეკრულების გაფორმებიდან 15 კალენდარული დღის განმავლობაში, ხოლო, მე-2 ეტაპზე, დარჩენილი რაოდენობა — ხელშეკრულების გაფორმებიდან არაუგვიანეს 30 კალენდარული დღისა.

განახლება: სტატიის თავდაპირველად გამოქვეყნებისას აღნიშნული იყო, რომ თითო ერთეულში მერია 450 ლარს გადაიხდიდა. უზუსტობა შესწორებულია.