31 წლის მუსიკოსმა, კეტ ჯენისმა, სიკვდილის წინ შვილთან ერთად დაწერილი სიმღერა გამოუშვა. მან სიმღერაზე საავტორო უფლებები 7 წლის შვილ ლორენს გადაუფორმა და სოციალურ ქსელში გამომწერებს სთხოვა, სიმღერისთვის მოესმინათ, რათა შვილისთვის სიკვდილის შემდეგ აქედან შემოსული თანხა დაეტოვებინა.

კეტს სიმსივნის დიაგნოზი 2021 წელს დაუსვეს. მართალია, მან დაავადება ერთხელ დაამარცხა და 2022 წელს განიკურნა, თუმცა სიმსივნის მეტასტაზები ამჯერად ფილტვებში აღმოაჩნდა. ცოტა ხნის წინ კეტმა თქვა, რომ სიმსივნე ზომაში 3-ჯერ უფრო მეტად გაიზარდა და გადარჩენის იმედი არ აქვს.

კეტის თქმით, შვილისთვის დასატოვებლად ბევრი არაფერი აქვს, თუმცა ეს სიმღერა მას სამუდამოდ დარჩება. სოციალურ ქსელში გავრცელებული პოსტი ინტერნეტში მილიონობით ადამიანმა ნახა და კეტის სიმღერა Dance You Outta My Head Itunes-ისა და ბილბორდის ჩარტებში მოხვდა.

მომღერალი ყვება, რომ თვალებს არ უჯერებდა, როდესაც გვიან ღამით გაღვიძებულმა ტელეფონში ეს სიახლე ნახა. სიმღერის იდეა ჯენისს წინა გაზაფხულზე მოუვიდა, როდესაც ლორენთან ერთად მანქანით სეირნობდა. მან და მისმა შვილმა სიმღერა ერთად დაწერეს, რამდენიმე თვეში კი კეტმა სიმღერა დაასრულა.

"ყველამ იცის, რომ სიმსივნეს უკვე დიდი ხანია ვებრძვი. იმედია, მოგეწონებათ. არ ვიცი, ცოცხალი როდემდე ვიქნები, ამიტომ მინდოდა, ამ სიმღერის გამოშვება მომესწრო. ჩემი ხელოვნება ერთადერთია, რასაც დავტოვებ", — ამბობს ის.

მოუსმინეთ კეტის სიმღერას აქ: