მოკლედ: ოკუპირებულ ტერიტორიებზე ეთნიკურ ქართველებს მშობლიურ ენაზე განათლების მიღების შესაძლებლობა არ ეძლევა, გალსა და ახალგორში კი ქართველებს მშობლიურ ენაზე
საუბარი ეკრძალებათ.

  • ინფორმაციას დემოკრატიის კვლევის ინსტიტუტი (DRI) ავრცელებს.

დეტალები: DRI-ის მიხედვით, 2003 წლიდან, რაც გალის რეგიონის ზედა ზონის ცხრავე სკოლა სრულად რუსულ სწავლებაზე გადავიდა, ქართულ ენას კვირაში სამი საათი ეთმობა.

  • 2015 წლის სექტემბრიდან გალის რეგიონის ქვედა ზონის თერთმეტივე ქართულენოვანი სკოლის დაწყებით კლასებში სწავლა რუსულ ენაზე დაიწყო.
  • "ოკუპირებული აფხაზეთის ტერიტორიაზე ბოლო ქართულენოვანმა გამოშვებამ სწავლა 2022 წელს დაამთავრა", — წერს DRI.
  • ამჟამად, 2023 წლის მდგომარეობით, გალის რეგიონში, ჯამში, 27 სკოლა ფუნქციონირებს.

DRI აღნიშნავს, რომ "რუსული სცენარი გაიმეორეს ცხინვალის რეგიონშიც", სადაც 2017 წლიდან სასწავლო პროცესი რუსულ ენაზე მიმდინარეობს.

  • "ახალგორში, ამჟამად, დარჩენილია მეთერთმეტე კლასი, რომელიც განათლებას ქართულ ენაზე იღებს, მომდევნო სასწავლო წლიდან კი ყველა სკოლა სრულად რუსული გახდება", — წერს DRI.
  • ახალგორში ამჟამად მხოლოდ 6 სკოლა ფუნქციონირებს.

DRI წერს, რომ ცხინვალის რეგიონის ბაგა-ბაღებში აღსაზრდელებსა და აღმზრდელებს ქართულ ენაზე საუბარს უშლიან. მათი თქმით, იგივე ხდება ოკუპირებულ აფხაზეთში. "ქართულ ენაზე საუბრის გამო ბაგა-ბაღის არაერთ თანამშრომელს დაემუქრნენ სამსახურიდან გათავისუფლებით", — წერს DRI.

რა შედეგი მოიტანა გალსა და ახალგორში რუსულ ენაზე სწავლამ: DRI-ის შეფასებით, სწავლების რუსულ ენაზე გადასვლამ სერიოზულად გააუარესა განათლების ხარისხი გალსა და ახალგორში. მოსწავლეებს რუსულ ენაზე სწავლა, ხოლო მასწავლებლებს საგნების რუსულ ენაზე სწავლება უჭირთ.

  • DRI წერს, რომ განსაკუთრებით ცუდ მდგომარეობაში მოსწავლეები არიან, იმის გამო, რომ შინ მეგრულად ან ქართულად საუბრობენ, სკოლაში კი ყველა საგანს რუსულად ასწავლიან.
  • შედეგად,"მოსწავლეები ვერც ერთ ენას ვერ ფლობენ სრულყოფილად, რაც სამომავლოდ უმაღლესი განათლების მიღებასა და კარიერულ განვითარებას უზღუდავს", — წერს DRI.