ცნობილ ამერიკელ მსახიობსა და კომიკოსს, უილ ფერელს, მალე კიდევ ერთ ფილმში ვიხილავთ. უილი და ჰარპერი — ასე ჰქვია დოკუმენტურ ნამუშევარს, რომელიც ფერელისა და მისი ტრანსგენდერი საუკეთესო მეგობრის, ჰარპერ სტილის, ურთიერთობაზე გვიყვება. ფილმი მათ თავად წარუდგინეს აუდიტორიას სანდენსის კინოფესტივალზე.

"სამიოდე ზაფხულის უკან, ჰარპერმა თავის ახლო მეგობრებს მეილი გამოგვიგზავნა, რაღაც უჩვეულო უნდა მოგიყვეთო", — იხსენებს ფერელი, — "მან აგვიხსნა, რომ ტრანზიციის პროცესს იწყებდა. ამ ამბავმა გაგვაოცა და გაგვახარა. ყველა ჩვენგანმა მხარდაჭერა და სიყვარული აღვუთქვით, მაგრამ მერე გაჩნდა შეკითხვები: როგორ დავეხმაროთ? რა უნდა გავაკეთოთ?".

მსახიობის თქმით, ჰარპერის ქამინგ აუთამდე არაფერი იცოდა ტრანსგენდერი ადამიანების შესახებ.

"ტრანსგენდერ ადამიანს შევხვედროდი, მაგრამ პირადად არავის ვიცნობდი", — ჰყვება ფერელი, — "ასე რომ, ეს ჩემთვის უცნობი სივრცე იყო. [...] სისგენდერ ადამიანებს გვაქვს შესაძლებლობა, დავსვათ შეკითხვები, მოვუსმინოთ და ამ გზაზე ვიყოთ მათ გვერდით, როგორც მეგობრები".

ჰარპერი ამატებს, რომ ფილმი არის ტრანსგენდერი ადამიანის სისგენდერ მეგობარზე, რომელსაც თავადაც უწევს ერთგვარი ტრანზიციის, ცვლილებების პროცესის გავლა.

ფოტო: IMDb

მართალია, ნამუშევარი დოკუმენტურია, მაგრამ მას ამერიკული კინოსთვის დამახასიათებელი განწყობაც ახლავს: 30-წლიანი მეგობრობის შემდეგ, თავიანთი ურთიერთობის სხვა ეტაპზე გადასვლის გასააზრებლად, ფერელი და სტილი მანქანით მოგზაურობას იწყებენ. როგორც ფილმის აღწერიდან ვიგებთ, ეს არის ამბავი "მეგობრობაზე, ტრანზიციასა და ამერიკაზე".